პარლამენტის ყოფილი თავმჯდომარე, დავით უსუფაშვილი, კონსტიტუციაში შესატან ცვლილებებზე საუბრობს.
ის აცხადებს, რომ პრეზიდენტის არჩევის წესთან დაკავშირებით, არსებობს, როგორც იმის შესაძლებლობა, რომ 2023 წელს საქართველოს ჰყავდეს არჩეული პრეზიდენტი, ასევე იმისაც, რომ 2020 წელს არჩეულმა პარლამენტმა გადაწყვიტოს, თუ რა წესით აირჩევა 2023 წელს ახალი პრეზიდენტი.
"პრეზიდენტის ინსტიტუტი ვერა და ვერ ვაქციეთ იმად, რაც კონსტიტუციაში დიდი ასოებით გვიწერია - სახელმწიფოს ერთიანობის სიმბოლოდ და გარანტად. ასე გაგრძელება უბრალოდ დაუშვებელია, არა ზვიადის, ედუარდის, მიშას, გიორგის მიმართ, არამედ ქართული სახელმწიფოს მიმართ. ეს ერთნაირად უნდა გაითვალისწინონ მომავალმა ზვიად-გიორგიებმაც და მთელმა საქართველომაც. შექმნილ ვითარებაში, სწორედ ამის გაუთვალისწინებლობა იქნება "ოცნების" მიერ გადაწყვეტილების ერთპიროვნულად მიღება, თუმცა, არსებობს გამოსავალი.
ხელისუფლების მიერ შემოთავაზებული მოდელითვე, ერთი მხრივ, 2023 წლამდე ქვეყანას ეყოლება პირდაპირი წესით არჩეული პრეზიდენტი. მეორე მხრივ, გარკვეულ შემთხვევებში, კონსტიტუციური ცვლილებებით, ორი მოწვევის პარლამენტის მიერ მიღებაა გათვალისწინებული. ამ ორი პოლიტიკური და სამართლებრივი მიდგომის ერთობლიობა (სათანადო ტექნიკური დამუშავების შემდეგ) იძლევა შესაძლებლობას, რომ 2023 წლის საპრეზიდენტო არჩევნების სისტემის საკითხზე საბოლოო გადაწყვეტილება 2020 წელს არჩეულ პარლამენტს მივანდოთ.
ამ შემთხვევაში, მინიმუმ 4 წლით ერთნაირად დაკმაყოფილდება დღეს არსებული ყველა მოთხოვნა და პოზიცია, ხოლო საბოლოო გადაწყვეტილება ხალხის უმრავლესობის გადაწყვეტილებას დაეფუძნება, ვინაიდან, 2020 წლის საარჩევნო კამპანიაში მონაწილე პოლიტიკური ძალები ამ საკითხს გვერდს ვერ აუვლიან",- განაცხადა უსუფაშვილმა.
