ენმ-ს პოლიტსაბჭოს თავმჯდომარის მოადგილემ ზაზა ბიბილაშვილმა პარტიის ოფისიდან ონლაინრეჟიმში შეკითხვებზე პასუხის დროს განაცხადა, რომ ივანიშვილის ხელისუფლება მშვიდობიანად უნდა დასრულდეს.
ზაზა ბიბილაშვილმა ენმ-ს რეფორმირებაზეც ისაუბრა და მხარდამჭერებს მოუწოდა, აქტიურად ჩაერთონ ამ პროცესში.
„უკმარისობის განცდა არის სწორი, ვიღებთ ყველა შენიშვნას და ყველა საყვედურს და ჩაერთეთ უფრო აქტიურად და გვითხარით თქვენი პოზიცია - რა არის გასაკეთებელი, როგორ არის გასაკეთებელი , ჩვენი მიზანია, რომ ეს ჭირი, რომელიც 2012 ბიძინა ივანიშვილმა ამ ქვეყანას მოუტანა, დასრულდეს.
ქუჩის აქციები იყო და ყოველთვის იქნება, მაგრამ ბუნებრივია, ქუჩის აქციები არ არის თვითკმაყოფილების მიზანი, რომ ჩვენ გამოვედით, შევიკრიბეთ და დავიშალეთ. აქციების მიზანია, რომ ხელისუფლებამ ყურად იღოს პროტესტი.
დღეს ხელისუფლება არ არის ხალხის, ეს ყველაფერი არის ივანიშვილზე მორგებული. როდესაც ივანიშვილი გვიფეთქებს საყდრისს, თავზე ადგამს დედაქალაქს „პანორამა თბილისს“, ეს ყველაფერი ხალხს არ მოსწონს, მაგრამ ივანიშვილს, რომელმაც ქართული პოლიტიკა დააბინძურა ბინძური ფულით, ფეხებზე ჰკიდია, და თუ ხელისუფება ყურად არ იღებს ხალხის ხმას, მაშინ მშვიდობიანი გზით უნდა დავასრულოთ ეს ხელისუფლება“, - აღნიშნა ზაზა ბიბილაშვილმა.
