ბიზნესმენი, საქართველოს ფეხბურთის ფედერაციის ყოფილი პრეზიდენტი ზვიად სიჭინავა სამეგრელოში, სოფელ ხურჩაში რუსი ოკუპანტების მიერ საოკუპაციო ზოლის გადმოწევის შესახებ გავრცელებულ ინფორმაციას ეხმიანება და ამბობს, რომ ოკუპანტები ამჯერად უკვე სამეგრელოსა და სამურზაყანოში აფათურებენ ხელებს.
"რუსული საოკუპაციო მანქანა მიზანმიმართულად აგრძელებს ძირძველი ქართული მიწების მცოცავ ანექსიას და ახლა ის ხელს სამეგრელოსა და სამურზაყანოშიც აფათურებს.
ჩვენ კარგად გვახსოვს 2008 წლის ის პერიოდიც, როცა რუსი ოკუპანტების მიერ სოფელი ხურჩა მთლიანად იყო ოკუპირებული და პირველივე მოსახლის საცხოვრებელ სახლში შტაბი იყო გახსნილი, მაგრამ ჩვენ შევძელით სტატუს-კვოს აღდგენა.
ახლა კი, რუსი ოკუპანტებისგან წაქეზებული არაკაცის მიერ პატრიოტი ქართველი ვაჟკაცის გიგა ოთხოზორიას მკვლელობა არ იკმარეს და საოკუპაციო ზოლი რამდენიმე ასეული მეტრით ხურჩის სიღრმეში გადმოწიეს.
ეს ხდება იმ ფონზე, როცა გიგა ოთხოზორიას მკვლელი დაუსჯელად დადის, ეს ხდება იმ ფონზე, როცა რუსული საოკუპაციო მანქანა თავად აფხაზებსაც უქმნის საფრთხეს და ცდილობს, საბოლოოდ ჩატეხოს ხიდი ჩვენს შორის, ეს ფაქტი კი „ეთნოკონფლიქტად“ გაასაღოს.
ხურჩაში საოკუპაციო ზოლის გადმოწევა და იქ მცხოვრები გლეხების სახნავ-სათესი მიწების ორად გაყოფა მავთულხლართებით კრემლის სახის კიდევ ერთი გამოვლინება და ჩვენი დაცინვაა, რაზეც ყველამ ხმა უნდა ავიმაღლოთ და ხმამაღლა უნდა ვთქვათ: არა მცოცავ ოკუპაციას!".
