2017-04-28 15:38

მე არც არავის არ შევეკვრები და არაფრის დიდებით არ ვივაჭრებ კონსტიტუციით- ეს განცხადება, საქართველოს პრეზიდენტმა გიორგი მარგველაშვილმა, კამპანია "კონსტიტუცია ყველასია" ფარგლებში, ახალციხის უნივერსიტეტში სიტყვით გამოსვლისას გააკეთა.  

პრეზიდენტმა საპარლამენტო უმრავლესობის მიერ შემუშავებულ საკონსტიტუციო ცვლილებათა პაკეტზე ისაუბრა და განაცხადა, რომ კონსტიტუციის პროექტი ხელმოწერილია მხოლოდ ერთი პოლიტიკური ძალის მიერ. მარგველაშვილი მიიჩნევს, რომ დოკუმენტი არღვევსსამართლიანი საარჩევნო სისტემის პრინციპებს. 

„სამწუხაროდ, ეს დოკუმენტი შექმნილია, ხელმოწერილია კონსესუსის გარეშე. ალბათ იცით და სამწუხაროა, რომ ყველა პოლიტიკურმა ძალამ, რომელიც შედიოდა კომისიაში დატოვა კომისიის შემადგენლობა და მხოლოდ ერთი პოლიტიკური ძალის მიერ არის ხელმოწერილი ეს დოკუმენტი. წესი, რომლის მიმართაც პოლიტიკურმა პარტიებმა გამოთქვეს სერიოზული შეშფოთება და წესი, რომელიც შინაარსობრივად არის სამწუხაროდ არის აცდენილი სამართლიანი არჩევნების ძირითად ფუნდამენტურ პრინციპებს,“ - განაცხადა პრეზიდენტმა.  

გიორგი მარგველაშვილი სიტყვით გამოსვლისას პრეზიდენტის არჩევის წესსაც შეეხო და თქვა, რომ პრეზიდენტის არჩევის უფლება მოსახლეობას გაუგებარი მიზეზებით ერთმევა.

„გაუგებარი მიზეზით ერთმევა პრეზიდენტის არჩევის უფლება ამომრჩეველს და მომავალი ვერსიით პრეზიდენტს აირჩევენ გარკვეული ხმოსნები. ძალიან ნათლად მინდა გითხრათ, არასდროს კონკრეტულად მე არც არავის არ შევეკვრები და არაფრის დიდებით არ ვივაჭრებ კონსტიტუციით. არ ვივაჭრებ იმ ძირითადი დოკუმენტით, რომელიც მიმაჩნია, რომ უნდა იყოს ყველას გამაერთიანებელი და არა ცალკეული პოლიტიკოსების ამბიციების შემკრები,“ -აცხადებს გიორგი მარგველაშვილი.