პრეზიდენტის ადმინისტრაცია პარლამენტის წინააღმდეგ კამპანიას გეგმავს - ამის შესახებ განცხადება, საქართველოს პარლამენტის თავმჯდომარემ გააკეთა.
საკონსტიტუციო ცვლილებებზე კობახიძემ მოსამართლეებთან შეხვედრაზე ისაუბრა, რომელთაც კონსტიტუციის ახალი პროექტი გააცნო.
“ჩვენ გვაქვს დიდი იმედი, რომ კომპრომისს აზრი არ დაეკარგება. თუმცა, არის კონკრეტული პროცესები, რომელიც საპირისპიროზე მიუთითებს. სამწუხაროდ, საქართველოს პრეზიდენტმა დაიწყო მთელი კამპანია სახელმწიფო საკონსტიტუციო კომისიის წინააღმდეგ, რომელიც გრძელდება და ეს კამპანია გაგრძელდება როგორც ჩანს, საქართველოს პარლამენტის წინააღმდეგ.
არასწორი ნაბიჯები იდგმება ჩვენი ოპონენტების მხრიდან, პრეზიდენტის თაოსნობით, ეს არის ძალიან სამწუხარო მოვლენა. პრეზიდენტი, რომელიც უნდა იყოს ზეპარტიული ფიგურა ამ სისტემაში, პარტიებთან თანხმდება თავისი ადმინისტრაციის მეშვეობით, იმაზე თუ როგორ უნდა მიიტანონ შეტევა საქართველოს პარლამენტზე “ - განაცხადა კობახიძემ.