2017-04-28 15:17

2016 წლის ივლისიდან დეკემბრამდე პერიოდში საქართველოს მთავრობამ Facebook-ისგან მომხმარებლების შესახებ ინფორმაცია 15-ჯერ მოითხოვა, სულ საუბარია 26 ანგარიშზე.

აქედან მოთხოვნათა 86.67% დაკმაყოფილდა, ამის შესახებ ოფიციალურ ინფორმაციას Facebook ავრცელებს. საქართველოს მთავრობამ ჩანაწერების შენახვის თხოვნით Facebook-ს 15-ჯერ მიმართა, საუბარია 28 ანგარიშზე. ამასთან დაკავშირებით Facebook განმარტავს, რომ ისინი ინახავენ იმ ტიპის ჩანაწერებსა და ინფორმაციას, რომლებიც დაკავშირებულია ოფიციალურ საგამოძიებო პროცესთან და რომლებიც შესაძლოა, პოტენციური მტკიცებულება იყოს. 

ვებგვერდზე გამოქვეყნებულ ინფორმაციაში განმარტებულია, რომ Facebook-მა დააკმაყოფილა მხოლოდ ის მოთხოვნები, რომლებიც დაკავშირებული იყო კრიმინალურ შემთხვევებთან და ინფორმაციის გაცემა საჭირო იყო საქმის გამოძიებისთვის.

„ჩვენ შევისწავლეთ თითოეული მოთხოვნა, რამდენად ჰქონდა ამას ლეგალური საფუძველი და ჩვენ უარი ვთქვით ინფორმაციის გაცემაზე იმ შემთხვევებში, რომლის დროსაც საეჭვო იყო, რამდენად ჰქონდა ამ მოთხოვნას ლეგალური საფუძველი“ - აღნიშნულია Facebook-ის განცხადებაში.