-
2017-04-27 23:30
ნაციონალური მოძრაობის წევრი კოტე იოსელიანი ამბობს, რომ ირაკლი სესიაშვილმა იცრუა, როდესაც თქვა, რომ მის შვილს სამართალდამცავ ორგანოებთან შეხება არ ჰქონია.
იოსელიანის განცხადებით, ,,ქართული ოცნება" ცდილობს, ამ სკანდალური საქმიდან სესიაშვილის დისტანცირება მოახდინოს.
"სახეზე გვაქვს კიდევ ერთ ტყუილი. ორდღიანი ფიქრის შემდეგ, დღეს, ირაკლი სესიაშვილმა დაადასტურა და აღიარა ის, რასაც საერთოდ გამორიცხავდა. აქვე უნდა ვისაუბროთ იმაზე, რომ დანაშაულის ადგილიდან ამოღებული თითის ანაბეჭდები ნამდვილად ეკუთვნის დავით სესიაშვილს. ირაკლი სესიაშვილი უტიფრად იტყუება, რომ მის შვილს, თურმე, სამართალდამცავ სტრუქტურებთან შეხება არ ჰქონია და პოლიციის შენობაშიც არ ყოფილა ნამყოფი.
დღეს გამოვლინდა, რომ ის ნამყოფიც არის და მათთან გარკვეული სახის კომუნიკაციაც ჰქონდათ. მთელი "ქართული ოცნება" და ბიუროკრატია ცდილობს იმას, რომ როგორმე, ამ საქმისგან ნეპოტისტი და მატყუარა სესიაშვილის დისტანცირება მოახდინოს",- განაცხადა კოტე იოსელიანმა.
"ნაციონალურ მოძრაობაში" აცხადებენ, რომ 2015 წელს მომხდარ მანქანის ქურდობაში ირაკლი სესიაშვილის თითის ანაბეჭდები ფიგურირებს. მათივე თქმით, ფაქტის შესახებ დავით სესიაშვილის სუს-ში დასაქმების შემდეგ, მისი პირადი მონაცემების გადამოწმებისას გახდა ცნობილი. ამის საპირისპიროდ, ირაკლი სესიაშვილმა ოპონენტები ცილისწამებაში დაადანაშაულა და პროკურატურასაც მიმართა.