,,ნაციონალური მოძრაობა" განცხადებას ავრცელებს, სადაც ირაკლი სესიაშვილის შვილის, დავით სესიაშვილის სახელმწიფო უსაფრთხოების სამსახურში მუშაობის დაწყების შესახებ აცხადებს.
მათი თქმით, დავით სესიაშვილს წარსულში სისხლის სამართლის დანაშაული აქვს ჩადენილი.
ნაციონალური მოძრაობის წევრის კოტე იოსელიანის განცხადებით, მას შემდეგ რაც დავით სესიაშვილმა სუს-ში მუშაობის დასაწყებად საჭირო პროცედურები გაირა, აღმოჩნდა, რომ მისი თითის ანაბეჭდები აღმოჩენილი იყო წარსულში ჩადენილი ქურდობის ერთ-ერთ გაუხსნელ საქმეში.
,,სისხლის სამართლის საქმე აღიძრა თბილისში ქურდობის ფაქტზე, რომელიც დღემდე გამოუძიებელია, დანაშაულის ფაქტზე ჩატარებული საგამოძიებო ოპერატიული ღონისძიებების შედეგად საექსპერტო კრიმინალურმა ჯგუფმა დანაშაულის ადგილიდან ამოიღო შესაძლო დამნაშავის ხელის ანაბეჭდები, რომელიც ექსპერტიზის ბიურომ ცნო ვარგისად. მიმდინარე წელს სუს-ში მუშაობის დაწყების სურვილით მოქალქემ მიმართა, სპეციალური პროცედურების გავლის შემდეგ ანალიზმა გამოავლინა, რომ აღებული თითის ანაბეჭდების ნიმუშები დანაშაულის ადგილიდან აღებული ანაბეჭდების იდენტურია.
ჩვენი ინფორმაციით ამ თანხვედრის შესახებ ინფორმირებული იყო სუსი. საუბარია მოქალაქეზე, რომელიც გახლავთ ქართული ოცნების ერთ-ერთი ლიდერის ირაკლი სესიაშვილის შვილი დავით სესიაშვილი.“- განაცხადეს ,,ნაციონალურ მოძრაობაში“.