2017-03-24 17:04

შეურაცხმყოფელი ეპითეტები იმისთვის არის, რომ რაღაცნაირად ჩაგვრთონ ჩვენ აი ამ რაღაც შოუში- ეს განცხადება, საქართველოს პრეზიდენტმა გააკეთა.

გიორგი მარგველაშვილი მმართველი გუნდის მიერ ე.წ. მოსმენების შესახებ კანონზე ვეტოს დაძლევის საკითხს, ტელეკომპანია "მაესტროს" ეთერში გამოეხმაურა. გიორგი მარგველაშვილი ამბობს, რომ "ქართული ოცნების" დეპუტატთა ნაწილი, საკუთარი განცხადებებით ქვეყანაში არსებული პრობლემების გადაფარვას ცდილობს. პრეზიდენტის თქმით, არის მცდელობა, ვეტო იქნას წარმოჩენილი, როგორც პოლიტიკური დაპირისპირება.

პრეზიდენტის შეფასებით, ასევე ხელისუფლების წარმომადგენელთა მხრიდან არის მცდელობა, რომ პრეზიდენტის ადმინისტრაცია შეურაცხმყოფელი ეპითეტებს გამოყენებით, ჩართოს "რაღაც შოუში" და ამ ლანძღვის ფონზე გადაიფაროს მთავარი პრობლემატიკა

"არის მცდელობა, ეს ვეტო იქნას წარმოჩენილი, როგორც პოლიტიკური დაპირისპირება, მაგრამ მე არ დავიღლები ჩემი მოვალეობის შესრულებაში. გარკვეული დეპუტატთა ჯგუფისთვის "ქართულ ოცნებაში" რა თქმა უნდა, ეს მოსახერხებელია, იმისთვის, რომ გადაიფაროს არსებული პრობლემები, რომ ეკონომიკა ისე კარგად ვერ ვითარდება, რომ პრობლემები არის დასაქმების თვალსაზრისით. შეურაცხმყოფელი ეპითეტები იმისთვის არის, რომ რაღაცნაირად ჩაგვრთონ ჩვენ აი ამ რაღაც შოუში, სადაც ერთმანეთს ვლანძღავთ და ამ ლანძღვის ფონზე გადაიფარება მთავარი პრობლემატიკა, მაგრამ არ ჩავერთვები," - განაცხადა გიორგი მარგველაშვილმა.