2017-03-21 14:01

პარლამენტის იურიდიულ საკითხთა კომიტეტში ფარულ მოსმენა-მიყურადებასთან დაკავშირებულ საკანონმდებლო პაკეტზე პრეზიდენტის მოტივირებული შენიშვნების განხილვა მიმდინარეობს. პრეზიდენტის ინიციატივებს კომიტეტის წევრებს ანა დოლიძე აცნობს. 

ფარულ მოსმენა-მიყურადების კანონპროექტთან დაკავშირებით, პრეზიდენტის მოტივირებულ შენიშვნებში ყურადღება ორ მნიშვნელოვან საკითხზეა გამახვილებული, თუმცა კანონში რამდენიმე საკამათო საკითხიცაა. ანა დოლიძის თქმით, პრეზიდენტის ადმინისტრაციამ ყურადღება გაამახვილა იმაზე, რომ სააგენტო ნამდვილად დამოუკიდებელი უნდა იყოს სუსისგან.

„სააგენტო ნამდვილად დამოუკიდებელი უნდა იყოს სუს-ისგან. ამისთვის კარგი იქნება, თუ ის ვერტიკალურად დაექვემდებარება პრემიერ-მინისტრს. რაც შეეხება მეორე საკითხს, სახელმწიფომ სამართლიანად უნდა აანაზღაუროს ის ხარჯები, რომელსაც კომპანიები გასწევენ.

ჩვენი ამბიცია უნდა ყოფილიყო შეგვექმნა ისეთი სისტემა, რომელიც ერთი მხრივ კანონიერად წადგებოდა ჩვენს უსაფრთხოების მიზნებს, მაგრამ მეორე მხრივ ყველა მოქალაქეს შეუქმნიდა წარმოდგენას, რომ მის პირად ცხოვრებაში არავინ არ ჩაერევა თუ ის არაფერს არ დააშავებს. სამწუხაროდ, ეს თვისობრივად ახალი სისტემა ჩვენ ვერ შევქმენით",-განაცხადა ანა დოლიძემ.