2017-03-21 13:58

დრანდის ციხეში დატყვევებული გიორგი ლუკავას მეუღლე აცხადებს, რომ მისი მეუღლე აფხაზურმა მხარემ შეიწყალა. ლალი ბასარიას ინფორმაციით, ლუკავა უკვე 2 თვეა შეწყალებულია აფხაზური მხარის მიერ, თუმცა მისი გაცვლა გაურკვეველი მიზეზებით არ ხდება.

„დღეს საქართველოს ხელისუფლებას შიში აქვს იმისა, რომ გაცვლა რომ მოხდეს, ამას არ მოჰყვეს დიდი აურზაური და ჩემს ხელთ არსებული ინფორმაციით, ესენი ითხოვენ ან კადაევს ან კიდევ მეორე ჩეჩენს. ხელისუფლებას შეუძლია მოლაპარაკება გააკეთონ საბაზო სისტემით, გადაუხადონ ის, რასაც ისინი ითხოვენ და გადმოიყვანონ ლუკავა გიორგი,“ - აცხადებს გიორგი ლუკავას მეუღლე ლალი ბასარია.

სუს-ის ანალიტიკური დეპარტამენტის ხელმძღვანელის მოადგილე, კახაბერ ქემოკლიძე კი ამბობს, რომ აფხაზეთის დე ფაქტო ხელისუფლება გიორგი ლუკავას გათავისუფლებაზე არ საუბრობს.

ლალი ბასარიამ დღეს მტკიცებულებად ლუკავასთან სატელეფონო ჩანაწერი წარმოადგინა.