2017-03-19 02:52

ოკუპირებულ აფხაზეთში, ოჩამჩირის რაიონის სოფელ მოქვში მცხოვრები 117 წლის ქალი 16 მარტს, თავისი დაბადების დღიდან ზუსტად ერთი თვის თავზე გარდაიცვალა. 

ნუცა ადლეიბა-დუმავა 1900 წლის 16 თებერვალს დაიბადა. ის ორ მსოფლიო ომს, 1917 წლის რევოლუციას, გასაბჭოებას, კოლექტივიზაციას, რეპრესიებს, "პერესტროიკას" და სსრკ-ს დაშლას, ასევე, რუსეთის მიერ ინსპირირებულ ქართულ-აფხაზურ დაპირისპირებას მოესწრო. 

ოკუპირებულ რეგიონში მცხოვრები საქართველოს მოქალაქე თავს კარგად გრძნობდა, თუმცა, ბოლო ორი კვირის განმავლობაში ჯანმრთელობის გაუარესებას უჩიოდა. 

ოკუპირებული აფხაზეთის დე ფაქტო ხელისუფლებისა და სხვადასხვა არასამთავრობო ორგანიზაციების წარმომადგენლებს ნუცა ადლეიბა-დუმავას მონაცემები გინესის წიგნში მოსახვედრად ჰქონდათ გაგზავნილი, რათა ის პლანეტის ყველაზე ხნიერ ადამიანად დასახელებულიყო, თუმცა, რეკორდების წიგნში მოხვედრა ვერ ხერხდებოდა საქართველოს ტერიტორიულ მთლიანობასთან დაკავშირებული პრობლემების გამო, რადგან განაცხადის ავტორები არ ეთანხმებოდნენ გინესის წიგნის კომისიის წინადადებას, ნუცა ადლეიბა-დუმავა დასახელებულიყო, როგორც საქართველოში მცხოვრები და ამ ქვეყნის მოქალაქე.