გუგული მაღრაძემ სტრასბურგში ჩიორა თაქთაქიშვილი საქართველოს დამცირებასა და შერცხვენაში დაადანაშაულა. "გააპაზორე საქართველო კიდევ ერთხელ", - ასე მიმართა მან უმცირესობის წევრს, როცა ის ინტერვიუს მისაცემად ემზადებოდა.
"ქვეყნის ინტერესების წინააღმდეგ" მიმართული უწოდეს უმრავლესობის წევრებმა ჩიორა თაქთაქიშვილის შესწორებას, რომელიც ევროსაბჭოს რეზოლუციის პროექტში შევიდა. რეზოლუცია ევროსაბჭოს წევრ ქვეყნებში არასამთავრობო ორგანიზაციებისა და უფლებადამცველების როლისა და დაცვის გაძლიერებას ეხება.
"იმ აბზაცში, სადაც საუბარია ადამიანის უფლებების დაცვაზე და ზეწოლაზე საქართველო უნდა ამოვიღოთ. არ შერცხვა ჩიორა თაქთაქიშვილს და საქართველოს ჩაწერა იმ აბზაცში მოითხოვა სადაც თურქეთი, რუსეთი და აზერბაიჯანია. არ შეიძლება ეს იქნეს დაშვებული. ეს ღია ბრძოლაა ქვეყნის წინააღმდეგ,"- აცხადებს ეკა ბესელია.
ერთიანი ნაციონალური მოძრაობის წევრს კი მიაჩნია, რომ ქვეყანა რუსეთის გვერდით რეზოლუციის პროექტში იმიტომ მოხვდა, რომ ქვეყანაში ოპოზიციური პოლიტიკური პარტიის წარმომადგენელბი იდევნებიან.
"საქართველო მოხვდა იმ ქვეყნების ჩამონათვალში, სადაც პოლიტიკური დევნაა და ოპოზიციური პოლიტიკური პარტიის ლიდერები დაპატიმრებულები არიან. რუსეთი ნამდვილად ცუდი ქვეყანაა, მაგრამ მის გვერდით საქართველოს ყოფნა ბიძინა ივნიშვილის დამსახურებაა,"- აცხადებს ჩიორა თაქთაქიშვილი.
