2016-01-26 20:56

2014 წლის აგვისტოში სამხედრო ექსპერტი ირაკლი ალადაშვილი წერდა, რომ საქართველოში აწყობილი ჯავშანმანქანის – “დიდგორის” სამედიცინო-საევაკუაციო მოდიფიკაცია საუდის არაბეთის უდაბნოს ქვიშას შეეჭიდება, სადაც მას 800 კმ ექნება გასავლელი და ყველასთვის დასამტკიცებელი, რომ “დელტას” სამხედრო პროდუქცია მსოფლიოშიც კონკურენტუნარიანია.

"საუდის არაბეთის თავდაცვის სამინისტრომ სწორედ 2014 წელს გამოაცხადა დახურული ტენდერი სამედიცინო-საევაკუაციო ჯავშანმანქანის შესარჩევად და მასში მონაწილეობის მიღების სურვილი რვა კომპანიამ გამოთქვა, რომელთაგან ერთი პოლონურია, დანარჩენი კი – ამერიკული.

“დელტამ” ამ ტენდერის შესახებ გვიან შეიტყო, თუმცა ერთი საერთაშორისო პარტნიორის დახმარებით მაინც მოახერხა დახურულ ტენდერში ჩართვა. კონკურსის პირობების თანახმად, ცხრავე მანქანას საუდის არაბეთის სამხედროები გამოცდიან და ყოველი ეტაპის შემდეგ თავიანთ შენიშვნებს გამოთქვამენ. საგულისხმოა, რომ თითქმის ყველა კონკურსანტი ჯავშანმანქანა ამერიკული Ford F550-ის შასიზეა შექმნილი (ისევე, როგორც ჩვენი “დიდგორი”), რაც მათ თითქმის ერთნაირ პირობებში აყენებს.

გადამწყვეტი მნიშვნელობა მიენიჭება კონსტრუქციულ დეტალებს – თუ რამდენად ეფექტურია ძრავის გაგრილების სისტემა უდაბნოს მაღალ ტემპერატურაზე, ქვიშაში გამავლობის ხარისხი, საკაცეების მოხერხებულად განთავსება და ა.შ.

“დელტაში” ამაზე იზრუნეს და “დიდგორი” სამედიცინო-საევაკუაციო მოდიფიკაციის კონდიციონერით აღჭურვეს, ხოლო უკანა სადესანტო კარი გააგანიერეს, რომ საკაცე შეტეულიყო". -ირაკლი ალადაშვილი, "კვირის პალიტრა".

საველე ტესტირებებისას ადგილობრივი მძღოლ-მექანიკოსების მიერ მანქანა სხვადასხვა რელიეფის პირობებში გამოიცადა. მათ შორის, მანევრირება მაღალ და დაბალ სიჩქარეებზე, მუხრუჭების, აჩქარების, მაქსიმალური სიჩქარის ტესტი, გამავლობის შემოწმება მაღალმთიან და უდაბნოს პირობებში, ძრავისა და სავალი ნაწილების მაქსიმალური დატვირთვის შემოწმება 40 კილომეტრიანი გარბენის პირობებში ზღვრულ სიჩქარეებზე.

სულ ტესტირებაში მონაწილეობდა სხვადასხვა კომპანიების მიერ წარმოებული ექვსი ერთეული ჯავშანმანქანა - როგორებიცაა: Oshkosh, Streit Group, AIG, Steyr, Lenco bearcat.

ქართულმა სამედიცინო ჯავშანმანქანამ ტესტირების ყველა ეტაპი წარმატებით გაიარა და ამერიკულ კომპანია LENCO-სთან ერთად, ფინალში გავიდა, თუმცა ქართულმა ჯავშანმანქანამ ყველა ტექნიკური პარამეტრით უკეთესი შედეგი აჩვენა, ვიდმე მისმა ამერიკელმა კონკურენტმა.

ტესტირებების დასრულების შემდეგ, თვეების განმავლობაში სატენდერო კომისიაში მიმდინარეობდა მიღებული შედეგების შეჯამება და ანალიზი. 2015 წლის დასაწყისში კომისიის მიერ სსსტც „დელტას“ წარედგინა კონკრეტული ტექნიკური მოთხოვნილებები, რის შედეგადაც „დელტამ“ კონკრეტულ მოთხოვნებზე და პირობებზე მორგებული სამედიცინო-საევაკუაციო ჯავშანმანქანის პროტოტიპი დაამზადა.

გასული წლის მარტში „დელტას“საუდის არაბეთის ოფიციალური დელეგაცია ეწვია, რა დროსაც მათ „დელტას“ საწარმოო ბაზა შეაფასეს და მათი მოთხოვნების შესაბამისად მოდიფიცირებული უახლესი სამედიცინო ჯავშანმანქანა დაათვალიერეს.

გასული წლის დეკემბრის მდგომარეობით, საუდის არაბეთთან გაფორმებულია ხელშეკრულება ასზე მეტი ქართული წარმოების სამედიცინო-საევაკუაციო ჯავშანმანქანის მიწოდებაზე, რომელთა საერთო ღირებულება ას მილიონამდე ლარია. კონტრაქტის წარმატებით დასრულების შემდეგ - „დელტა“,საუდის არაბეთის სამეფოს სახმელეთო ძალებთან თანამშრომლობას კვლავ განაგრძობს და სხვადასხვა დანიშნულების რამდენიმე ასეულ ჯავშანმანქანას მიაწვდის.

ჯავშანტექნიკის პირველი პარტია 12 მანქანის რაოდენობით, საუდის არაბეთში 30 იანვარს გაიგზავნება.