2014-02-10 19:24

800-ზე მეტი პატიმარი ამბობს, რომ შიმშილობს, მაგრამ ეს არ ნიშნავს, რომ მართლაც 800 კაცი შიმშილობს - აცხადებს სასჯელაღსრულების მინისტრი სოზარ სუბარი.

მინისტრის თქმით, არასწორია ინფორმაცია იმის შესახებაც, რომ საპატიმროში თვითდაზიანება 46-მა პატიმარმა მიიყენა. სუბარის განცხადებით, იმ ადამიანთა რიცხვი, რომელთაც გასული ღამის შემდეგ სამედიცინო დახმარება აღმოუჩინეს მხოლოდ 31-ია.

„31 ადამიანია, რომელსაც აღმოვუჩინეთ დახმარება. პატიმრებმა თქვეს, რომ დაზიანებულია 46, მაგრამ იქ რომ იყოს შვიდასი დაზინებული თუ ადამიანს არ სჭირდება სამედიცინო დახმარება ეს არის ან მსუბუქი დაზინება ან იქ დაზიანება არაა.

800-ზე მეტი შიმშილობსო. 800-მა ადამიანმა განაცხადა, რომ ისინი შიმშილობენ, ეს არ ნიშნავს, რომ ისინი მართლაც რვაასივე შიმშილობს.“- განაცხადა სუბარმა.

მისივე თქმით, სიცრუეა ის ინფორმაცია, რომ გეგუთში წუხანდელი ინციდენტი სპეცრაზმის დაწესებულებაში შესვლას უკავშირდებოდა.

„ორი დღის განმავლობაში ვავრცელებდით ინფორმაციებს, რომ პატიმრები ურეკავდნენ ოჯახის წევრებსა და ჟურნალისტებს და ამბობდნენ, რომ სპეცრაზმი შეგვყავს. ეს იყო პროვოკაციის შემადგენელი ნაწილი, რომ ვითომ იქ შედიოდა სპეცრაზმი, სპეცრაზმი იდგა რუსთავში.

წუხელაც თითქოს მიზეზი იყო, რომ სპეცრაზმი შედიოდა და ეს იყო ტყუილია, თუ ვინმემ დაზიანება მიიყენა იმიტომ, რომ სპეცრაზმი შედიოდა, იყო ტყუილი.“- განაცხადა სოზარ სუბარმა.