საქართველოს პრემიერმინისტრი აცხადებს, რომ მომხდარი ტრაგედია „ნაციონალურმა მოძრაობამ“ თავისი პოლიტიკური მიზნებისთვის გამოიყენა. ის კანცელარიის წინ მიმდინარე, ზურაბ გურიელიძის მხარდამჭერი აქციის ორგანიზატორად სწორედ ამ პარტიას ასახელებს.
"მე დღეს აქ ვიხილე ნაციონალური მოძრაობის წევრები, რომლებმაც რამდენიმე ათეული ახალგაზრდის მობილიზება შეძლეს აქ და შეეცადნენ სხვა დანარჩენების შეცდომაში შეყვანას.
ეს არის ყოვლად ამორალური და უზნეო საქციელი. მე მინდა ყველა პოლიტიკურ ძალას მოვუწოდო, რომ კრიზისულ ვითარებაში იმოქმედონ ქვეყნის ინტერესებიდან და არა საკუთარი პარტიული ინტერესებიდან გამომდინარე", - განაცხადა პრემიერმინისტრმა და "აბსურდი" უწოდა ინფორმაციას ზოოპარკის დირექტორის შესაძლო დაკავების შესახებ: "თუ ვინმე დაიცავს ზურას, ეს პირველ რიგში, მე ვიქნები", - თქვა ირაკლი ღარიბაშვილმა.
შეგახსენებთ, ზოოპარკის დირექტორის ზურაბ გურიელიძის მხარდამჭერი აქცია კანცელარიის წინ "ფეისბუქზე" დაანონსდა, მის დაწყებამდე დაახლოებით საათნახევრით ადრე. ეს მას სემდეგ მოხდა, რაც ზურაბ გურიელიძე დაკითხვაზე დაიბარეს.
