2014-02-08 22:38

არასამთავრობო ორგანიზაცია „მოქალაქის“ დამფუძნებელმა, ბიძინა ივანიშვილმა „საზოგადოებრივი მაუწყებლის“ ეთერში საპატრიარქოსთან და ეკლესიასთან დაკავიშირებით მის მიერ გაკეთებულ კომენტარზე განმარტება გააკეთა:

 „მე გულწრფელად ვარ განწყობილი ეკლესიისადმი, მე მიყვარს პატრიარქი და იმიტომ ვაძლევ თავს უფლებას ვთქვა რაღაც ისეთი, რაც არ მომწონს და ხაზი გავუსვა ამას, მე ასეთი განწყობა მაქვს“, - განაცხადა ბიძინა ივანიშვილმა.  

შეგახსენებთ, "მოქალაქის" პრეზენტაციაზე ბიძინა ივანიშვილმა განაცხადა:

"...რაღაც დონეზე ტრადიციებს ვიცავ და უდიდეს პატივს ვცემ, უდიდეს პატივს ვცემ თვითონ პატრიარქს, მე ვფიქრობ, რომ ძალიან თბილი ურთიერთობა მაქვს და ძალიან მიყვარს, მაგრამ საზოგადოებამ უნდა გადალახოს ის ბარიერიც, რომ ეკლესიის თემა არის ტაბუდადებული და იქ რაც ითქმება, ეს აუცილებლად არის უმწიკვლო და ხელშეუხებელი.

პატრიარქი ბრძანებს თუ სხვა მსახური, ეს დამოკიდებულება ჩემი აზრით, არის ზედმეტად გაფეტიშებული და გადაჭარბებული და ჩემი აზრით ეს არ უნდა იყოს ასე; არ საჭიროებს ამას არც პატრიარქი, პირადად მას ამით ცუდ სამსახურს უწევენ და არ საჭიროებს არც ეკლესია.

ეკლესიაში, ჩემი აზრით, არის იგივე პრობლემები, რაც არის საზოგადოებაში. ყოველ შემთხვევაში ნაკლები არა, რაც ჩემი აზრით, ასეც უნდა იყოს, რადგან ეკლესიის მსახურნიც არიან ჩვენი საზოგადოების წევრები.

შესაბამისად, ისევე შეიძლება შეეშალოთ იქაც, ისევე შეიძლება მოხდეს დარღვევებიც და იყოს კრიტიკაც და არის კიდეც. კარგად ვიცით ჩვენ – ეს იქაც არის. ნუ გეშინიათ ამაზე საუბრის. ისინი საჭიროებენ კრიტიკას, მითითებასა და მინიშნებას.

დამოკიდებულება რაც არის, რომ ეკლესიის თემა არის ტაბუდადებული, ჩემი აზრით, არის შეურაცხმყოფელი ჩვენი საზოგადოებისთვის.

ამ თემამაც იმიტომ გამოიწვია ის დიდი ვნებათაღელვა. პატრიარქსაც შეიძლება შეეშალოს."