2015-01-12 21:05

ცოლ-ქმარი, მათი ვაჟი, რძალი და მცირეწლოვანი შვილიშვილი - ეს ადამიანები სომხეთის ქალაქ გიუმრიში განთავსებული რუსეთის სამხედრო ბაზის ჯარისკაცმა ვალერი პერმიაკოვმა დახოცა.

დახოცილები ბინაში მეზობლებმა იპოვეს. ექვსივეს ცეცხლსასროლი იარაღიდან მიყენებული ჭრილობები აღენიშნებათ. ტრაგედიასთან დაკავშირებით სომხეთის პრეზიდენტმა სერჟ სარქსიანმა სამართალდამცველი ორგანოების ხელმძღვანელებთან სელექტორული საგანგებო თათბირი ჩაატარა. დაგეგმილია უშიშროების საბჭოს მოწვევა. ექვსი ადამიანის მკვლელობაში ეჭვმიტანილი იძებნება.

სომხეთის თავდაცვის მინისტრს სეირან ოგანიანს დაუკავშირდა რუსი კოლეგა სერგეი შოიგუ, რომელმაც მზადყოფნა გამოთქვა, "დაღუპულთა ახლობლებს გაუწიოს ყოველგვარი დახმარება და ითანამშრომლოს სომხეთის საგამოძიებო ორგანოებთან".

მკვლელობის ადგილზე აღმოჩენილია მკვლელობის იარაღი - "AK-74" სისტემის ავტომატი და ვაზნები, ასევე მჭიდი. ადგილზევე იპოვეს სამხედრო ფეხსაცმელი წარწერით "პერმიაკოვი". აღსანიშნავია, რომ ოჯახის კუთვნილი ოქროს ნივთები, რომლებიც თვალსაჩინო ადგილზე იყო დადებული, არ გამქრალა, ამიტომ გამოძიება გამორიცხავს ძარცვის მიზნით თავდასხმას. 

თავდასხმა ავეტისიანების ოჯახზე ორშაბათს დილით მოხდა. ოჯახის მეშვიდე წევრი, 6 თვის სერიოჟა ავეტისიანი სიკვდილს საწაულებრივად გადაუღცა - ის საავადმყოფოშია გადაყვანილი. მკვლელობაში ეჭვმიტანილს ამ დრომდე ეძებენ. გადაკეტილია ქალაქის ყველა გასასვლელი.