ყვარელში პოლიციელის მკვლელობასთან დაკავშირებით განცხადებას ავრცელებს შინაგან საქმეთა სამინისტრო. მასში ნათქვამია, რომ მკვლელობა ცხელ კვალზე გაიხსნა და დაკავებულია 1986 წელს დაბადებული მამაკაცი ილია ს.
გამოძიების ინფორმაციით, ბრალდებულმა ყვარელში, ჭავჭავაძის ქუჩაზე, წლების წინ მომხდარი კონფლიქტის ნიადაგზე, ყვარლის რაიონული სამმართველოს დეტექტივის თანაშემწე გამომძიებელს, პოლიციის კაპიტანს გელა ფიცხელაურს გადაჭრილი სანადირო თოფით ესროლა და შემთხვევის ადგილიდან მიიმალა. დაჭრილი პოლიციელის გადარჩენა, სამედიცინო ჩარევის მიუხედავად, ვერ მოხერხდა. ის საავადმყოფოში მიყვანიდან რამდენიმე საათში გარდაიცვალა.
სამართალდამცველებმა ილია ს. დანაშაულის ჩადენიდან რამდენიმე საათში ყვარელში, კუდიგორის ქუჩაზე დააკავეს. მას გადაწყვეტილი ჰქონდა საქართველოს ტერიტორიის დატოვება და ინგლისში გამგზავრება. დაკავებული აღიარებს ჩადენილ დანაშაულს.
გამოძიება განზრახ მკვლელობის ბრალდებით მიმდინარეობს.
