2014-11-25 22:27

მიხეილ სააკაშვილმა რუსეთი ბიძინა ივანიშვილის ზვიგენს შეადარა და განაცხადა, რომ ამ ზვიგენთან ერთად საქართველო წლების განმავლობაში ცურავდა.

"ზვიგენი რომ ჰყავს იქ ივანიშვილს... ჩაუყრის თავის შვილებს მარტო ან ჩახტება თვითონ? იგივე ზვიგენია რუსეთი... ამ ზვიგენთან ერთად ვცურავდით ჩვენ წლების განმავლობაში და ამ ზვიგენმა ხან ერთი ნაწილი მოგვაჭამა, ხან მეორე..." - განაცხადა "არჩევანის" ეთერში მიხეილ სააკაშვილმა.

სააკაშვილის თქმით, ადრინდელი საგარეო პოლიტიკა რომ შენარჩუნებულიყო, ახლა რუსეთს ის ყველაფერი, რაც ხდება აფხაზეთში, დაუჯდებოდა ზალიან ძვირად, სანქციების თვალსაზრისით. მისივე თქმით, საქართველოს ახლანდელი ხელისუფლება ხალხის ზურგს უკან აწარმოებს მოლაპარაკებას. 

საქართველოს მესამე პრეზიდენტის თქმით, მან წამოიწყო ლაზიკის პორტის მშენებლობა, რომელიც ბიძინა ივანიშვილმა პირველ რიგში დაბლოკა. "ეს იმას ნიშნავს, რომ ივანიშვილმა დაბლოკა ჩვენი პროაქტიური პოლიტიკა, რითაც აფხაზები უნდა მოგვეზიდა. ახლა რით აპირებენ მოზიდვას? ჩადით, ნახეთ ანაკლიაში, კარკასები და ჩონჩხებია დარჩენილი, მაშინ როცა სულ რაღაც 18 თვე რომ დაგვცლოდა, იქ გაკეთდებოდა ისეთი სასწაული, როგორიც არ ყოფილა აქამდე...".

მიხეილ სააკაშვილის თქმით, დაკითხვაზე დაბარებულ მის ყოფილ პირად ოპერატორს დაუსვეს შეკითხვები 2008 წლის 8 აგვისტოს უშიშროების სხდომის შესახებ, სადაც მისგან აინტერესებდათ, როგორ ვსახავდით ჩვენ ოსი ხალხის ამოხოცვის გეგმას. ეს არის ის დრო, როცა ანწუხელიძეს ვერ აჩოქებდნენ ცხინვალში, ეს არის ის დრო, როცა ჩვენ ჩამოვყარეთ რუსული თვითმფრინავები, როცა რუსი გენერალი ხრულიოვი დაჭრეს ჩვენმა ბიჭებმა... თურმე ამ დროს ჩვენ ვისხედით და ოსების გენოციდს ვაწყობდით...", - განაცხადა მიხეილ სააკაშვილმა და დაამატა: "ამას მოჰყვა დღეს რუსეთის საგამოძიებო კომიტეტის წარმომადგენლის განცხადება, რომ ჩემს წინააღმდეგ აღძრავენ საქმეს და ამას მოჰყვა განცხადებები და გაფრთხილება ლიტვის პრეზიდენტის გრიბაუსკაიტეს წინააღმდეგ, რომ ის სააკაშვილის ბედს გაიზიარებს..."