ღამის საათებში ინციდენტი მოხდა გარდაბანში, სადაც ერთმანეთს ადგილობრივი ქართველი და აზერბაიჯანელი მოსახლეობის ნაწილი დაუპირისპირდა. ხელჩართულ ჩხუბში ორასამდე ახალგაზრდა მონაწილეობდა. ვითარების განმუხტვა სპეცრაზმის ადგილზე მისვლის შემდეგ მოხერხდა.

გვიან ღამით თბილისში, ახალგაზრდა მამაკაცი სავარაუდოდ, დანით დაჭრეს. მან სახლში, საირმის ქუჩაზე ტაქსით მისვლა მოახერხა, მანქანიდან გადმოსვლის შემდეგ კი გონება დაკარგა.

აფხაზეთის დე ფაქტო პრეზიდენტი ალექსანდრე ანქვაბი აცხადებს, რომ დათმობას არ აპირებს და ოპოზიციასთან დიალოგისთვის მზადაა, თუმცა, უკანონობას არ დაუშვებს. მას მხარი დაუჭირეს სამართალდამცველი სტრუქტურების წარმომადგენლებმა.

არასამთავრობო ორგანიზაცია GRASS-ის ერთერთი დამფუძნებელი სერგი კაპანაძე აფხაზეთში შექმნილ სიტუაციას აანალიზებს და წერს, რომ საქართველო განსაკუთრებული ყურადღებით უნდა მოეკიდოს ოკუპანტი რუსეთის პოზიციას. სერგი კაპანაძე მიიჩნევს, რომ რუსეთისთვის არ იქნება მარტივი აფხაზეთში ყირიმის სცენარის გათამაშება, მაგრამ ფაქტია, რომ ის ამას შეეცდება.

"კვირის პალიტრა" 23 მაისს სანაპიროზე მომხდარი ავარიის დეტალებზე წერს, სადაც ერთმანეთს "ბრაბუსის" ტიპის ჯიპი მსუბუქ ავტომანქანა "მერსედესს" შეეჯახა. ავარიის შედეგად 5 წლის ბავშვი ბებია-ბაბუასთან ერთად გარდაიცვალა. ავარიის შემდეგ ლუკა ცოცხალი იყო, თუმცა, კლინიკაში მისი გადარჩენა ვერ მოხერხდა.

საქართველოს განათლების ყოფილი მინისტრი დიმიტრი შაშკინი წერს, რომ განათლების სისტემაში მავნებლობის ზეიმი გრძელდება. ამ დასკვნას შაშკინი განათლების სამინისტროს ოფიციალური ანგარიშიდან გამომდინარე აკეთებს.

საპარლამენტო უმრავლესობის ერთ-ერთი ლიდერი გია ვოლსკი "ლიტერატურულ კაფეში" ზურაბ ჭიაბერაშვილსა და ნოდარ ლადარიაზე თავდასხმის ფაქტს ეხმიანება და თავდასხმაში ეჭვმიტანილების ხელწერილით გათავისუფლებაში მოულოდნელს ვერაფერს ხედავს.

საჯარო სკოლების ის მოსწავლეები, რომლებიც საატესტატო გამოცდებს აბარებენ, ტესტების ხარვეზებზე კონკრეტულად საუბრობენ და განათლების სამინისტროს მიმართავენ. ისინი ტესტებში არსებული ხარვეზების გასწორებასა და გამოცდებზე პროფესიონალი, მიუკერძოებელი დამკვირვებლების დაშვებას ითხოვენ.

ხობის სამონასტრო კომპლექსში, სადაც სპეციალურად ამ კომპლექსისთვის საქართველოს პატრიარქის ლოცვა-კურთხევით დაწერილი ხატი დააბრძანეს, ხობისა და ფოთის მიტროპოლიტმა გრიგოლმა იქადაგა და რუსეთ-საქართველოს ურთიერთობაზეც ისაუბრა.

უკრაინაში აფხაზეთიდან ჩასული "ბოევიკები" მოქმედებენ. როგორც "rbc.ua" იუწყება, ამის შესახებ უკრაინის სასაზღვრო სამსახურის უფროსმა, ნიკოლაი ლიტვინმა პრესკონფერენციაზე განაცხადა.