2014-08-13 23:48

საქართველოს თავდაცვისა და სს ყოფილი მინისტრი ბაჩო ახალაია უკრაინაში რუსეთის შეჭრის შემთხვევაში საქართველოში მობილიზაციის გამოცხადებას აანონსებს და საგანგებო მიმართვაში წერს, რომ ეს იქნება პასუხი უკრაინელების მხრიდან აფხაზეთის ოკუპაციის დროს გაწეულ დახმარებასა და საქართველოს ერთიანობისთვის მებრძოლთა რიგებში დგომაზე.

"აფხაზეთის ხმა" გთავაზობთ ბაჩო ახალაიას საგანგებო მიმართვას:

თავისუფალი საქართველოს თავისუფალ მოქალაქეებს!

ძმებო, დღეს ნამდვილად მიმდინარეობს დაუნდობელი ბრძოლა საქართველოს თავისუფლებისთვის, მომავლისთვის და ეს ფრონტის ხაზი გადის უკრაინაზე. გარწმუნებთ, ყველაფერს ვაკეთებთ საქართველოს პატრიოტები, რომ უკრაინელების 20 წლის წინანდელი, აფხაზეთში ჩვენთვის გაწეული დახმარება არ იყოს დავიწყებული, სწორედ იმიტომ, რომ ჩვენი უკრაინელი ძმები ისევ ჩვენს გვერდით დადგნენ სოხუმის და გაგრის მისადგომებთან.

მაგრამ არსებობს კიდევ უფრო დიდი საფრთხე - მაღალი ალბათობა უკრაინაში რუსეთის რეგულარული არმია შეიჭრას. ამ მომენტისთვის გვჭირდება მობილიზება, მხოლოდ ქართველი ოფიცრების და სამხედროების მხარდაჭერა არ იქნება საკმარისი, აუცილებელია თავისუფალი საქართველოს თავისუფალი მოქალაქეების მობილიზება, რათა დამატებითი და ძლიერი წინააღმდეგობა გავუწიოთ უკრაინაში პუტინის რუსეთს.