2014-08-12 21:25

ჩაქვში მცხოვრები 19 წლის ფეხმძიმე ინდირა სურმანიძე 11 აგვისტოს საღამოს 22:00 საათზე შეუძლოდ გახდა, რის გამოც სასწრაფო დახმარება გამოიძახეს.

ოჯახის წევრები ამბობენ, რომ სასწრაფოს ერთი საათი ელოდნენ, თუმცა ორსულის მდგომარეობა გართულდა და მისი საავადმყოფოში გადაყვანა გაუმართავი „ჟიგულით“ სცადეს.

მოძველებულ ავტომობილს გზაში საბურავი გაუსკდა, რის შემდეგაც ოჯახს ორსულის საავადმყოფომდე მიყვანაში საპატრულო პოლიციის ეკიპაჟი დაეხმარა.

გიორგი დუმბაძე - ინდირა სურმანიძის მამამთილი:

ცუდად იყო ჩემი რძალი. დავრეკე 112-ზე, დაელოდეთ და აუცილებლად მოვა სასწრაფო დახმარებაო, ასე მითხრეს. ერთ საათი ველოდებოდით სასწრაფოს, მაგრამ არ მოვიდა, თან რძალი უკვე ძალიან ცუდად იყო და გადავწყვიტეთ, ჩემი გაუმართავი "ჟიგულით" წაგვეყვანა საავადმყოფოში.

"ბენზეს" ტრასაზე მანქანას საბურავი გაუსკდა და გავჩერდით შუა გზაზე, ამ დროს დავინახეთ პატრულის მანქანა, გავაჩერე და ვთხოვე, დამეხმარეთ, მიშველეთ მეთქი, შვილი მიკვდება და გადაგვარჩინეთ-თქო.

მათ ყველა ღონე იხმარეს, სწრაფად მიიყვანეს საავადმყოფოში და გადაარჩინეს, რისთვისაც ძალიან დიდ მადლობას ვუხდი. უკვე ორ საათზე მეტი დრო იყო გასული და მერე მოგვაკითხა სასწრაფო დახმარებამ.

თამაზ ლაგვილავა - პატრულ-ინსპექტორი:

თამარ მეფის გამზირზე მე და ჩემი მეწყვილე ვარეგულირებდით ინტენსიურ მოძრაობას, როდესაც მოგვმართა მოქალაქემ.  მანქანა იყო მოძველებული და მოძრაობა ინტენსიური, ის ვერ ახერხებდა ქალბატონის გადაყვანას სამშობიარო სახლში.

 ქალბატონი გადმოვსვით პატრულის ავტომანქანაში, დანარჩენი ეკიპაჟების დახმარებით მონაკვეთი სამშობიარო სახლამდე გათავისუფლდა, ჩემი მეწყვილე პირველად დახმარებას უწევდა ქალბატონს, სულ რამდენიმე წუთში საავადმყოფოს მორიგე ექიმს ჩავაბარეთ პაციენტი და ყველაფერი დასრულდა კეთილად. 

ambebi.ge