ქარელის რაიონში ყინწვისის წმინდა ნიკოლოზის სახელობის ტაძარი გაძარცვეს. წაღებულია წმინდა ნიკოლოზის ხატისთვის შეწირული ოქროს და ვერცხლის ნაკეთობები.
ტაძრის ერთ-ერთი მსახურის მამა საბას განცხადებით, ეს პირველი შემთხვევა არ ყოფილა, მანამდეც მომხდარა, რომ შესაწირი ყუთები გატეხეს და თანხა წაიღეს...
„კარი ჩარჩოდან რამდენიმე სანტიმეტრზეა გამოზნექილი და მავთული ან რკინის ჯოხი აქვს შეყოფილი, რომლითაც წმინდა ნიკოლოზის ხატზე ჯაჭვით ჩამოკიდული შეწირულობა, ოქროს სამკაულები, რასაც მისწვდა, ყველაფერი ჩამოუგლეჯია.
თუმცა, ეტყობა, რომ ყველას ჩამოხსნა ვერ შეძლო, ჯვარი ადგილზეა. ეტყობა, გვიან ღამით შეიპარა, მწუხრის მსახურების შემდეგ, დილას რომ მივედით, ასეთი სურათი დაგვხვდა. შეძრწუნებულები ვართ...
ავადმყოფი და შეურაცხადი, ცოდო და გაჭირვებული ადამიანი აკეთებს ამას. ამის გამკეთებელს სულიერადაც უჭირს და ხორციელადაც. საცოდავი და შესაბრალისია, კაცი, რომელიც ამას გააკეთებს. ჩვენ ყველამ უნდა ვილოცოთ ასეთი ადამიანისთვის, რომ გონს მოვიდეს და გონება გაეხსნას.
წმინდა ნიკოლოზის ხატი გაძარცვა და შეუნდოს მას ამ სასწაულმოქმედმა წმინდანმა ეს უმძიმესი ცოდვა... ეკლესიის გაძარცვა და ხატების შეუარცხყოფა რომ ადამიანს მოაფიქრდება, იმას ძალიან უჭირს ყველანაირად, მათ შორის, გონებრივად და სასწრაფოდ უნდა დავეხმაროთ, რათა ბოლომდე არ დაიღუპოს,“ - ამბობს მამა საბა.
„კვირის პალიტრა“