2014-08-03 23:08

ინგა გრიგოლიას „რეაქციაში“ სტუმრობისას  რეჟისორმა გოგა ხაინდრავამ დაადასტურა, რომ ის რაც ირაკლი კოდუამ განაცხადა, ნამდვილად იგეგმებოდა.

„ის რაც ჩვენ ამ დღეებში გავიგეთ კოდუასგან, ნამდვილად იგეგმებოდა, მაგრამ იგეგმებოდა უტიაშვილისგან, მერაბიშვილის, სააკაშვილისგან და ეტყობა ავალებდნენ კოდუას.

ეს არის მცდელობა, გადააბრალონ სხვას ის, რის განხორციელებასაც თავად აპირებდნენ.

ეს არის პირსისხლიანი ჯგუფი, რომელმაც უამრავი უბედურება დაატრიალა და ის, რაც კოდუამ ილაპარაკა, ნამდვილად იგეგმებოდა, მაგრამ პირველ რიგში, ბადრი პატარკაციშვილის წინააღმდეგ და ამის მოწმე არის მათი გუნდის ერთ-ერთი ლიდერი ირაკლი ოქრუაშვილი, რომელმაც 2007 წლის გადაცემაში ისაუბრა, რომ მას სააკაშვილმა შეუკვეთა პატარკაციშვილის მკვლელობა.

ამასთან დაკავშირებით ჩვენ ვიცით ფაქტები, როდესაც ჩეჩენ საველე მეთაურს უკვეთავენ ბადრი პატარკაციშვილის მოკვლას და ამის შესახებ ის თავად ლაპარაკობს და ჩემს გუშინდელ ფილმში მთელმა მსოფლიომ იხილა ეს კადრები, ისევე, როგორც „მასტერას“ საუბარი იგივე საველე მეთაურთან, რომ ეს ისე უნდა მოხდეს, რომ რუსეთს დაბრალდეს.

ასე რომ, ბადრის მოცილების არაერთი მცდელობა იყო. ასევე, ალბათ, ჩაფიქრებული იყო და მეც მომდიოდა ინფორმაცია, რომ მაინც და მაინც გულზე არ ვეხატებოდი და ალბათ, ეს გეგმაც იყო.

ეს მათი გეგმები იყო და ბუნებრივია, ამას განახორციელებდნენ, რომ არ ყოფილიყო ღვთის მადლი და ბიძინა ივანიშვილი არ გამოჩენილიყო ამ ქვეყანაში და 2012 წლის 1-ელ ოქტომბერს ის არ მომხდარიყო, რაც მოხდა", - აღნიშნა ხაინდრავამ.