-
2014-08-01 12:59
ბაქოს „ნეფთჩისა“ და საჩხერის „ჩიხურას“ მატჩი კონფლიქტით დასრულდა.
გულშმატკივართა შორის ატეხილი ჩხუბის მიზეზი „ჩიხურას“ ფანების მიერ სტადიონზე საქართველოს რუქის ჩამოკიდება გახდა, სადაც ზაქათალა და კახი საქართველოს ტერიტორიად იყო მითითებული.
„ჩიხურას“ მთავარი მწვრთნელის, სოსო ფრუიძის თქმით, ვინც ეს რუკა გამოფინა, გუნდის ნამდვილი გულშემატკივარი არ არის.
ერთ-ერთი ინფორმაციით, საფეხბურთო მატჩისას დროშა, „ქართული სპორტის ქომაგებმა“ გამოფინეს. ტრიბუნებზე გამოტანილ დროშაზე სწორედ აღნიშნული ფან-კლუბის ლოგო იყო დატანილი.
ეს დროშა საფეხბურთო თუ სხვა სპორტული შეჯიბრებების დროს ყოველთვის იყო ტრიბუნაზე გამოტანილი და არაერთხელ გამხდარა უკმაყოფილების მიზეზი. ბოლო ასეთი შემთხვევა „ჩიხურა“-„ბურსას“ მატჩის დროს მოხდა.
მატჩის შემდეგ მომხდარი დაპირისპირებისას ტელეკომპანია „იმედის“ ჟურნალისტი სანდრო გოჩაშვილი და ოპერატორი გიორგი ცხელიშვილი დააკავეს.
სანდრო გოჩაშვილის თქმით, ოპერატორს აზერბაიჯანელი სამართალდამცველები ფიზიკურად გაუსწორდნენ. ქართველი ჟურნალისტები ერთ-ერთ განყოფილებაში ნახევარი საათის განმავლობაში ჰყავდათ გადაყვანილი.
„მე და ჩემი ოპერატორი გამოვედით სტადიონის გარეთ, სადაც გვინდოდა, რომ ქართველი გულშემატკივრები ჩაგვეწერა. ამ დროს დავინახეთ, რომ მათ აზერბაიჯანელი სამართალდამცავები ფიზიკურად უსწორდებოდნენ, ართმევდნენ დროშებს და ტენიდნენ პოლიციის დიდ ავტობუსში. როდესაც ჩვენ ამ კადრებს ვიღებდით.
ერთ-ერთმა პოლიციელმა ჩვენი დაკავების ბრძანება გასცა. მოცვივდნენ, ჩაგვტენეს მანქანაში, ჩემს ოპერატორს ფიზიკურადაც გაუსწორდნენ. წაგვართვეს კამერა და წაგვიყვანეს განყოფილებაში. იქ კი გვეკითხებოდნენ მხოლოდ ერთ რამეს, ვინ ყვიროდა „არმენიას“.
ამაზე ჩვენ, რა თქმა უნდა, პასუხი არ გვქონდა და იქით ვეკითხებოდით თუ რატო დაგვაკავეს და რატომ დააკავეს ქართველი გულშემატკივარი. ჩვენს დაკავებაზე მათ პასუხი არ ქონდათ და გულშემატკივრებზე ამბობდნენ, რომ „არმენიას“ ყვიროდნენ და ხო იცით, რომ ჩვენ ამას ვერ ავიტანდითო. განყოფილებაში დაახლოებით ნახევარი საათი დავყავით", - განაცხადა „ინტერპრესნიუსთან“ საუბარში გოჩაშვილმა.
მისივე თქმით, სამართალდამცველებმა მათ ყველა მასალა წაუშალეს, რაც სტადიონის გარეთ ჰქონდათ გადაღებული.