12 ივლისს რუსი თანამემამულეების სამართლებრივი დაცვის ცენტრის ორგანიზებით ახალციხეში საინფორმაციო სემინარი გაიმართა.
ცენტრის ხელმძღვანელი სემინარის მონაწილეებს რუსი ახალგაზრდების საქართველოს კავშირის უფლებადაცვით საქმიანობაზე ესაუბრა. სემინარის მონაწილეებს საქართველოს კანონმდებლობა ცენტრის იურისტებმა ჯაბა ბრეგვაძემ და ალექსანდრე ნოსელიძემ გააცნეს.
სემინარის მონაწილეებს ძირითადად ორმაგი მოქალაქეობის და მიწების ლეგალიზების საკითხები აინტერესებდათ. ახალციხემდე ანალოგიური ტიპის სემინარი ქალაქ გორში გაიმართა, რომლსაც 30-მდე ადამიანი ესწრებოდა, მათ შორის პედაგოგები, სტუდენტები. საინტერესოა ერთი გარემოება, რომ საზღვარგარეთ მცხოვრები თანამემამულეების მხარდაჭერისა და დაცვის ფონდის ოფიციალურ საიტზე გორსა და ახალციხეში სემინარის ჩატარების ინფორმაციასთან ერთად სამცხე ჯავახეთის და ახალქალაქის მუნიციპალიტეტის შესახებ ინფორმაცია ვრცლად არის მოწოდებული.
ვებ გვერდზე შემდეგ ინფორმაციას ვკითხულობთ: ახალციხის მუნიციპალიტეტი სამცხე ჯავახეთის მხარეში შედის , მდებარეობს საქართველოს სამხრეთში, მესხეთის ისტორიულ ტერიტორიაზე. ადმინისტრაციული ცენტრი- ახალციხე. ახალციხის რაიონის მოსახლეობა 4, 8 ათასი ადამიანია, მათგან 39 % ეროვნული უმცირესობაა: ძირითად მასას სომხური დიასპორა წარმოადგენს, არიან ასევე ბერძნული, რუსული და ოსური დიასპორის წარმომადგენლები. ახალციხის რაიონის თითქმის ყველა მცხოვრები რუსულენოვანია ან კარგად ფლობს რუსულ ენას. ცხოვრობს ასევე რუსეთის მოქალაქეების დიდი რაოდენობა, წერია ფონდის ოფიციალურ ვებგვერდზე.
სემინარს დაახლოებით 20-მდე ადამიანი ესწრებოდა.