2013-11-22 22:03

მიხეილ სააკაშვილი აშშ–ში შეხვედრებს მართავს და ქვეყნის პოლიტიკური სპექტრის წარმომადგენლებს ხვდება.

მიხეილ სააკაშვილი ვაშინგტონში იმყოფება, სადაც კონსულტაციები გამართა ამერიკის კონგრესის წარმომადგენელთა პალატისა და სენატის პოლიტიკურ ლიდერებთან. მიხეილ სააკაშვილი შეხვდა სენატორ ჯონ მაკკეინს, დემოკრატების ერთ-ერთ ლიდერს სენატორ ჯინ შახინსა და 20-მდე სხვა სენატორსა და კონგრესმენს.

სააკაშვილმა სენატორი მარკო რუბიო, რომელიც ამერიკის შეერთებული შტატების პრეზიდენტობის ერთ-ერთ მთავარ კანდიდატად სახელდება 2016 წლის არჩევნებისთვის ბრწყინვალების საპრეზიდენტო ორდენით დააჯილდოვა, რასაც პრეზიდენტობის ვადის ამოწურვის ბოლო დღეს მოაწერა ხელი.

მიხეილ სააკაშვილმა მადლობა გადაუხადა ამერიკელ პოლიტიკოსებს ნაყოფიერი თანამშრომლობისთვის და სთხოვა მათ გააგრძელონ ქართველი ხალხის მხარდაჭერა ევროატლანტიკური ინტეგრაციის გზაზე და დახმარება საქართველოს ტერიტორიის დამპყრობლის მხრიდან ზეწოლის მოგერიებაში. მიხეილ სააკაშვილმა ასევე ვახშამი გამართა ვაშინგტონის წამყვანი ანალიტიკური ცენტრების ხელმძღვანელებთან.

შეხვედრებს მიხეილ სააკაშვილთან ერთად ესწრებოდნენ მისი მრჩეველი - რაფაელ გლუკსმანი და საქართველოს პარლამენტის წევრი - მარიამ საჯაია.