2013-11-22 18:29

ვერსია იმის თაობაზე, რომ სოფელ კოლაგში გარდაცვლილი ჩვილის ბარბარე რაფალიანცის ოჯახის წევრები შსს-მ სიცრუის დეტექტორზე შეამოწმა, „კახეთის საინფორმაციო ცენტრმა“ რამდენიმე თვის წინ გაავრცელა.

დღეს ეს ვერსია გიორგი ღვინიაშვილმაც გაიმეორა. შეგახსენებთ, რომ გიორგი ღვინიაშვილი კახეთის ყოფილი გუბერნატორია და 2012 წლის საპარლამენტო არჩევნებზე კენჭს გურჯაანის რაიონში „ნაციონალური მოძრაობიდან“ იყრიდა. სწორედ ღვინიაშვილი დაადანაშაულა „ქართული ოცნების“ წარმომადგენელმა მანანა ბერიკაშვილმა არჩევნების წინადღეს 10 თვის ბარბარე რაფალიანცის მკვლელობაში.

დღეს გიორგი ღვინიაშვილმა განაცხადა, რომ მის ხელთ არსებული ინფორმაციით, შსს-მ ბარბარე რაფალიანცის მკვლელობის საქმე უკვე გახსნა, მაგრამ შედეგები არ საჯაროვდება. ამის მიზეზად ღვინიაშვილი სიცრუის დეტექტორზე შემოწმების შედეგებს ასახელებს. მისი თქმით, ბარბარე რაფალიანცის ოჯახის წევრები სიცრუის დეტექტორზე შემოწმდნენ და შსს-მ უკვე იცის, რომ ბავშვის გარდაცვალებაში ბრალი სწორედ მისივე ოჯახის წევრებს, კონკრეტულად კი დედას და დეიდას მიუძღვით.

ღვინიაშვილი ამბობს, რომ გამოძიების შედეგის გასაჯაროება ხელს არ აძლევს შსს-ს, რადგან ამ შემთხვევაში, ცრუ დასმენისთვის სისხლის სამართლის პასუხისგებაში უნდა მიეცეს მანანა ბერიკაშვილი:

„მე მაქვს ინფორმაცია, რომ ბარბარე რაფალიანცის საქმე გახსნილია, მაგრამ არ ახმაურებენ, რადგან „ქართულ ოცნებას“ არ აწყობს. საიდან გავიგე ეს ვერ გეტყვით. იმიტომ არ ახმაურებენ, რომ როგორც კი ამას იტყვიან, ის ადამიანი, ვინც მე ტრაგედიის ღამეს დამადანაშაულა, სისხლის სამართლის პასუხისგებაში უნდა მიეცეს.

ქალბატონი მანანა ბერიკაშვილი, რომელიც ახლა კულტურის მინისტრის მოადგილეა, ცრუ დასმენისთვის უნდა დაისაჯოს. მე ძალიან კარგად ვიცი სისხლის სამართლის კოდექსი. ცრუ დასმენა დანაშაულია. სრულიად ნათელია, რა მოხდა ამ ღამეს, „ქართულმა ოცნებამ“ გამოიყენა ეს წინასაარჩევნოდ და ცოცხების ფონზე ამომრჩეველი ამ ტრაგედიით დამძიმებული მიიყვანა საარჩევნო ყუთებთან,“ – განუცხადა კახეთის საინფორმაციო ცენტრს გიორგი ღვინიაშვილმა.