სიონის საკათედრო ტაძრის სასულიერო პირი მამა დავით ლასურაშვილი მედიით გავრცელებულ ბრალდებას პასუხობს იმის შესახებ, რომ მან სიონის ტაძრიდან ეთნიკურად სომეხი, 10 წლის ბავშვი გააძევა. მისი თქმით, მართლმადიდებლურ ტაძარში მხოლოდ მართლმადიდებლები ლოცულობენ, ტაძრის ნახვა კი ყველას შეუძლია.
„არავის არც ეს ბავშვი და არც მისი მშობლები ან თანხმხლები პირები არ გამოუძევებია ტაძრიდან. მართლმადიდებლური ტაძარი არის მართლმადიდებელი ადამიანების სამლოცველო სახლი, სადაც მხოლოდ მართლმადიდებლები ლოცულობენ.
რაც შეეხება ნახვას, უამრავი ადამიანი, მათ შორის სომხებიც, რუსებიც, მართლმადიდებლებიც და არამართლმადიდებლებიც შემოდიან ჩვენს ტაძარში, როგორც საკათედრო ტაძარში, ათვალიერებენ ამ ტაძარს და გადიან ისე, რომ მათ არავინ შეურაცხყოფს, არ აძევებს ამ ბავშვებს“ - აცხადებს მამა დავით ლასურაშვილი.
შეგახსენებთ, რომ სიონის ტაძრიდან მისი 10 წლის გოგონას გამოძევების შესახებ განცხადება გუშინ საქართველოს მოქალაქემ, ინა სუკიასიანმა გაავრცელა და ისტორია "აფხაზეთის ხმამაც" გამოაქვეყნა. პრესკონფერენცია, სადაც მან ამ თემაზე ისაუბრა, სტატიას თან ერთვის.
