2015-11-05 07:32

ცნობილმა უკრაინელმა რეჟისორმა მიხაილო ილიენკომ თბილისში 5-9 ნოემბერს დაგეგმილ საერთაშორისო კინოფესტივალს პროტესტი მისი პრორუსულობის გამო გამოუცხადა და საკუთარი ფილმი "Той Хто Пройшов Крізь В огонь" უკან გაიწვია. 

"დღეს ჩვენ გვყოფს ომი. ჩვენ გვყოფს ოლეგ სენცოვის დაპატიმრება მაშინ, როცა იგი ყირიმში, ფესტივალის ერთერთ ფილმს, "ორლეანს" იღებდა. წელიწადნახევრის შემდეგ სენცოვს 20 წლით პატიმრობა მიუსაჯეს მკაცრი რეჟიმის ციხეში. 

ვწუხვარ, რომ ფესტივალში მონაწილეთა შორისაა სტანისლავ გოვორუხინი, რომელიც არ მალავს თავის ანტიუკრაინულ შეხედულებებს. 

იძულებული ვარ, უარი ვთქვა ფესტივალში მონაწილეობაზე, უკიდურეს შემთხვევაში მანამდე მაინც, სანამ სენცოვი გისოსებს მიღმაა. იმედი მაქვს, 20 წელს არ მომიწევს ლოდინი - ჩემს ასაკში ეს საკმაოდ ძნელია", - წერს მიხაილო ილიენკო. 

შეგახსენებთ, თბილისში საერთაშორისო კინოფესტივალი 5-დან 9 ნოემბრამდე ტარდება, თუმცა, მას სახელი შეეცვალა და ახლა “თბილისის ღია კინოფორუმი” ჰქვია. კინოფორუმის ფარგლებში ილიენკოს ფილმის ჩვენება 7 ნოემბერს იყო დაგეგმილი. წელს, პოსტსაბჭოთა ქვეყნების ფილმების გარდა ფორუმი რამდენიმე ფილმს თურქეთიდან და ირანიდანაც უმასპინძლებს. ფესტივალის კინოჩვენებები "ამირანში" გაიმართება, ბილეთის ფასი კი 3 ლარია. 

ფესტივალზე 10 ქვეყანა 30 ფილმს წარადგენს. ფილმების უმეტესობა  რამდენიმე ქვეყნის კოპროდუქციაა; მათ შორის 10 დამოუკიდებელი რუსული ფილმია. ნაჩვენები იქნება ერთი ქართველი რეჟისორის, თინათინ ყაჯრიშვილის ფილმი “პატარძლები”. ფინანსურ მხარდამჭერას ფესტივალს უკვე თბილისის მერიაც უწევს.

“წინასაარჩევნო პერიოდში დავით ნარმანიას საარჩევნო პროგრამაში ერთ-ერთი მნიშვნელოვანი დაპირება იყო თბილისის, როგორც რეგიონის კულტურული ცენტრის სტატუსის შენარჩუნება. ამ კინოფესტივალის კონცეფცია საუკეთესოდ ეთანხმება ამას,” - აცხადებს თბილისის კულტურულ ღონისძიებათა ცენტრის ხელმძღვანელი, გიორგი წერეთელი.

ილიენკოს პროტესტის მიუხედავად, კინოფესტივალში მონაწილეობს რამდენიმე უკრაინული მოკლემეტრაჟიანი ფილმი, ხოლო უკრაინის კინოკავშირის ხელმძღავნელი სერგეი ტრიმბაჩი ამბობს, რომ ვიქტორ იუშენკოს პრეზიდენტობის დროს კინოხელოვნებას ყურადღება არ ექცეოდა, რაც ვიქტორ იანუკოვიჩის გაპრეზიდენტების შემდეგ შეიცვალა.

“უკრაინულ კინოს ვიქტორ იანუკოვიჩის შვილი პატრონობდა, ამიტომ ამ პერიოდში საკმაოდ მაღალბიუჯეტიანი ფილმები გადავიღეთ. ასევე, გამოჩნდა რამდენიმე ფილმი, რომლებმაც მსოფლიოს წამყვანი კინოფესტივალები მოიარეს და საკმაო დიდი მოწონებაც დაიმსახურეს,”- აცხადებდა სერგეი ტრიმბაჩი.

ვიდეო:  ფრაგემნტი მიხაილო ილიენკოს ფილმიდან