2015-01-27 15:03

22 იანვარს მომღერალმა სოფო ბედიამ და მიშა მესხმა ჯვარი დაიწერეს.

ჯვრისწერას მხოლოდ მეჯვარეები, სოფოს ძმა ბორისი და წყვილის რამდენიმე მეგობარი ესწრებოდა.

დარბაზში მოწვეულ სტუმრებს შორის იმდენი მომღერალი იყო, სცენასთან რიგი იდგა.

წყვილის ქორწილი გაალამაზეს ანსამბლებმა: „ფორტემ“, „თეატრალურმა კვარტეტმა“, „ქუჩის მუსიკოსებმა“, „ქუჩის ბიჭებმა“, „ალილომ“. სოლო სიმღერები შეასრულეს, ტატო გორედძიშვილმა, ლაშა ღლონტმა, გელა გნოლიძემ, გიორგი წერეთელმა. დუეტში იმღერა სოფომ ძმასთან, ბორის ბედიასთან ერთად.

საპატიო სტუმრებს შორის იყვნენ: სოზარ სუბარი მეუღლითურთ, მამუკა ლომაშვილი, ნანა ცინცაძე, ლელა ნინუა, პაატა თედიაშვილი, დათო როსტომაშვილი. ამ უკანასკნელის „მკერდის ცეკვამ“ ისე გაამხიარულა მაია ასათიანი, მთელი საღამოს განმავლობაში სთხოვდა, კიდევ იცეკვე, ვიდეო მინდა გადავიღოო. თამადის მოადგილე გახლდათ მომღერალი და ახლა უკვე მოცეკვავეც, ზურა მანჯავიძე.

ბედნიერმა წყვილმა სტუმრებისთვის „დაისი“ შეასრულა. იცეკვეს „აჭარულიც“ და „რუმბაც“. პატარძალმა ცეკვისთვის „რუმბა“ კაბა გამოიცვალა.

„ქართულ ცეკვაზე არ მივარჯიშია. გუშინ მაცეკვა ჩემმა მეგობარმა გოჩა დაუშვილმა. ამაზე ვნერვიულობდი ყველაზე მეტად, მეშინოდა, რომ არ გამომივიდოდა, მაგრამ გავართვი თავი. ძალიან მიყვარს ქართული ცეკვა, მაგრამ, ჩემი საქმიანობიდან გამომდინარე, არასდროს მქონდა საშუალება, დამეხვეწა. მხოლოდ სხვისი ყურებით ვტკბებოდი აქამდე.

სამწუხაროდ, სიმღერისგან ძალიან შორს ვარ, მიუხედავად იმისა, რომ ჩემი მეუღლეა სოფო ბედია. თუმცა, გასართობ შოუებში ერთჯერადად თუ ვიმღერებ ამით არაფერი დაშავდება,“ -აღნიშნა მიშა მესხმა.

„მიშას სახლში ახლა რემონტია, ამიტომ დროებით ჩემთან ვიცხოვრებთ. სავარაუდოდ თებერვალში ამერიკაში წავალთ. კონცერტი მაქვს და თან თაფლობის თვესაც მოვიწყობთ.

ბედნიერებაა, ღვთის წინაშე უკვე ცოლ-ქმარი ვართ. ამაზე დიდი ბედნიერება და საჩუქარი არ არსებობს,“ - განაცხადა სოფო ბედიამ.

http://primetimenews.ge/