2014-06-10 17:17

NDI-ის შეფასებით, NDI-ისა და ადგილობრივი ორგანიზაციების დამკვირვებლები აღნიშნავენ, რომ გასული წლის არჩევნებთან შედარებით პოლიტიკური ძალადობა გამწვავდა. 

ამის შესახებ ნათქვამია NDI-ის წინასაარჩევნო მისიის ანგარიშში, რომელიც დღეს გამოქვეყნდა. ანგარიშში საუბარია "ნაციონალური მოძრაობის" წევრებზე, მათ შორის ზურაბ ჭიაბერაშვილსა და დეპუტატ ნუზგარ წიკლაურზე განხორციელებულ თავდასხმაზე, ასევე დავიტ კოდუას ცემის ფაქტზე.

"სამოქალაქო საზოგადოების წარმომადგენელთა თანახმად, ზეწოლისა და პოლიტიკური ძალადობის მაჩვენებელი გასულ არჩევნებთან შედარებით შემცირდა. თუმცა NDI-ისა და ადგილობრივი ორგანიზაციების დამკვირვებლები აღნიშნავენ, რომ გასული წლის არჩევნებთან შედარებით, პოლიტიკური ძალადობა გამწვავდა, მათ შორის არის სისხლიანი ინციდენტებიც. 27 მაისს თბილისის ერთ-ერთ კაფეში "ნაციონალური მოძრაობის" პოლიტიკური საბჭოს წევრს, ზურაბ ჭიაბერაშვილს, დაესხნენ თავს. აღნიშნულმა საქმემ განაახლა დისკუსია პოლიტიკურად მოტივირებული ძალადობის შემთხვევებზე ქმედითი რეაგირების აუცილებლობაზე. მარტის ბოლოს პარლამენტის წევრი ნუგზარ წიკლაური რამდენიმე პირმა სცემა და მისივე განცხადებით, მისი გატაცებაც სცადეს. სამოქალაქო საზოგადოების ორგანიზაციებმა და სახალხო დამცველმა შესაბამის ორგანოებს ინციდენტის სრულყოფილი გამოძიებისკენ მოუწოდეს. მაისის დასაწყისში ბიზნესმენი დავით კოდუა სასტიკად სცემეს, რასაც პროკურატურამ ,,შურისძიების ნიადაგზე წინასწარი განზრახვით ჩადენილი ჯგუფური თავდასხმა" უწოდა", - ნათქვამია ანგარიშში. 

NDI აღნიშნავს, რომ მიუხედავად იმისა, რომ უწყებათაშორისი კომისიის თავმჯდომარემ და იუსტიციის მინისტრმა თეა წულუკიანმა ძალადობასა და ზეწოლებთან დაკავშირებით მკაცრი პოზიცია დაიკავა და უწყებათაშორისმა კომისიამ დადებითი შეფასება მიიღო, მმართველი პარტიის სხვა წევრების საჯარო განცხადებები უფრო ორაზროვანი იყო. 

NDI-ის მისია მიიჩნევს, რომ მთავრობისა და საკანონმდებლო ლიდერების მხრიდან აღნიშნული ფაქტების უფრო მკაცრად დაგმობა საარჩევნო კამპანიის პერიოდში და მის შემდგომ ძალადობის და ზეწოლის მიმართ შეუწყნარებლობის სიგნალს გააგზავნის. ასევე, აცხადებს, რომ შემდგომში ძალადობის პრევენციის მიზნით, უნდა ჩატარდეს სრულყოფილი და სწრაფი გამოძიება და დამნაშავე პირები დაისაჯონ.