"ნაციონალური მოძრაობა" მარნეულში გამგებლობის კანდიდატის, აკმამედ იმამყულიევის მოხსნასთან დაკავშირებით ცესკო-ს გადაწყვეტილებას გამოემხაურა.
როგორც პარტიაში აცხადებენ, "ერთიანი ნაციონალური მოძრაობა" გამოიყენებს კანონით გათვალისწინებულ ყველა საშუალებას და ამ უკანონო გადაწყვეტილებას სასამართლოში გაასაჩივრებს.
"მიუხედავად საზოგადოებრივი აზრის ერთსულოვნებისა, ძალიან სამწუხაროა, რომ ცესკო და პირადად მისი თავმჯდომარე აღმოჩნდა ინსტრუმენტი ხელისუფლების ხელში, რომელმაც დაადასტურა სრულიად უკანონო სურვილი, ნებისმიერი ძალისხმევით ჩამოაცილონ ოპოზიციური კანდიდატები საარჩევნო კამპანიას იმ საარჩევნო ოლქებში, სადაც ხელისუფლება დამარცხების რეალურ საფრთხეს ხედავს.
ფაქტობრივად საარჩევნო ადმინისტრაცია აღმოჩნდა ბოლო რგოლი იმ ერთთვიანი უკანონო მოქმედებების ჯაჭვისა, რომელიც მარნეულის რაიონის გამგებლობის კანდიდატის, აკმამედ იმამყულიევის წინააღმდეგ წარმოებდა. ამ კამპანიის უშუალო დამკვეთი არის საქართველოს მთავრობა და პირადად პრემიერ-მინისტრი ირაკლი ღარიბაშვილი.
აქვე შევახსენებთ საზოგადოებას, რომ აკმამედ იმამყულიევის კანდიდატურის მოხსნის თაობაზე "ქართული ოცნების" მხრიდან განხორციელებულ ქმედებებში ჩართულნი იყვნენ საქართველოს პარლამენტის თავმჯდომარე დავით უსუფაშვილი და პარლამენტის წევრი ალი მამედოვი", - აცხადებენ "ნაციონალურ მოძრაობაში".
პარტიაში აღნიშნავენ, რომ ბოლო პერიოდში პრემიერ-მინისტრ ღარბაშვილის მიერ გაჟღერებულმა მუქარამ, რომ არსად დაუშვებს ოპოზიციური პარტიის კანდიდატების გამარჯვებას, კულმინაციას მიაღწია.
"მას შემდეგ, რაც პოლიციის, პროკურატურისა და ადგილობრივი ხელისუფლების აღვირახსნილი ზეწოლებისა და შანტაჟის შედეგად "ერთიანი ნაციონალური მოძრაობის" 20-ზე მეტმა კანდიდატმა ე.წ. "საკუთარი სურვილით" მოიხსნა კანდიდატურა, ხელისუფლება ახალი ფორმის ზემოქმედებაზე გადავიდა. საკითხი ეხება მარნეულში საარჩევნო ბლოკ "ერთიანი ნაციონალური მოძრაობის" გამგებლობის კანდიდატს - აკმამედ იმამყულიევს.
ერთ თვიანი მოსყიდვის, მუქარისა და შანტაჟის უშედეგო კამპანიის შედეგად, კანონის მოთხოვნილი ვადების სრული დარღვევით, ხელისუფლების სატელიტმა არასამთავრობო ორგანიზაციამ საჩივარი შეიტანა მარნეულის საოლქო კომისიაში და მოითხოვა დარეგისტრირებული კანდიდატის რეგისტრაციის გაუქმება. მარნეულის საოლქო კომისიის თავმჯდომარემ სამართალდამცავების და ადგილობრივი ხელისუფლების წარმომადგენლების ზეწოლის შედეგად მიიღო სრულიად კანონსაწინააღმდეგო განკარგულება და აკმამედ იმამყულიევს საარჩევნო რეგისტრაცია გაუუქმა.
აღნიშნული ზეწოლების შესახებ დეტალური ინფორმაცია მოცემულია ახალგაზრდა იურისტთა ასოციაციის 7 ივნისის სპეციალურ განცხადებაშიც", - აცხადებენ პარტიაში.
განცხადების თანახმად, "ერთიანმა ნაციონალურმა მოძრაობამ" შესაბამისი საჩივრით მიმართა ცესკო-ს და იმედი ჰქონდა, რომ ცესკო იქნებოდა თანმიმდევრული, ობიექტური და იგივე გადაწყვეტილებას მიიღებდა ოპოზიციური კანდიდატის მიმართ, რა გადაწყვეტილებაც მიიღო ფოთისა და რუსთავის კანდიდატების მიმართ.
"აღსანიშნავია ის ფაქტი, რომ სწორედ ამ მოწოდებით მიმართეს ცესკო-ს "საერთაშორისო გამჭვირვალეობა - საქართველომ" და "ახალგაზრდა იურისტთა ასოციაციამ" სპეციალური განცხადებებით 7 ივნისს, ასევე, მარნეულის საკითხთან დაკავშირებით განცხადება გააკეთა ევროკავშირის სპეციალურმა წარმომადგენელმა სამართლებრივი რეფორმებისა და ადამიანის უფლებების საკითხებში თომას ჰამერბერგმა, სადაც აღნიშნა, რომ კანდიდატს ეკრძალება მონაწილეობა არჩევნებში თუ ის საზღვარგარეთ ცხოვრობს მუდმივად, მაგრამ ხშირად მოგზაურობის გამო არჩევნებში მონაწილეობა არ უდნა აეკრძალოს", - აცხადებენ პარტიაში.
ცესკომ "ერთიანი ნაციონალური მოძრაობის" კანდიდატს, აკმამედ იმამყულიევს არჩევნებში მონაწილეობაზე უარი უთხრა. რვა ხმით ხუთის წინააღმდეგ ცესკომ მარნეულის საოლქო საარჩევნო კომისიის დადგენილება ძალაში დატოვა. ცესკოს თავმჯდომარე თამარ ჟვანიას განმარტებით, კანდიდატი ვერ აკმაყოფილებდა კანონის იმ მოთხოვნას, რომლის მიხედვითაც, კანდიდატი ბოლო ორი წლის განმავლობაში საქართველოში უნდა ცხოვრობდეს.