-
2014-11-10 19:00
"რუსები ევროპის კართან - შენარჩუნდება თუ არა მშვიდობა ევროპაში?" - გამოცემა "ფორბსი" ამ სათაურით სტატიას აქვეყნებს: "უკანასკნელი მოვლენები ცხადყოფს სერიოზული საფრთხის შემცველი ინციდენტების სიმრავლეს რუსეთსა და დასავლეთს შორის, რომელიც სამხედრო აქტივობებთანაა დაკავშირებული. თუ უკრაინაში სიტუაცია გამწვავდა, არსებობს სამხედრო დაპირისპირების სერიოზული საფრთხე", - წერს გამოცემა.
ევროპელი ლიდერების მიერ შეგროვებული ინფორმაცია მოიცავს დაახლოებით 40 ინციდენტს, უკანასკნელი რვა თვის განმავლობაში. მათ შორის 11 განსაკუთრებულად პროვოკაციული ხასიათის მქონეა.
მიუხედავად იმისა, რომ პირდაპირი სამხედრო დაპირისპირება არ მომხდარა ამ დრომდე, დაფიქსირდა ესტონეთის სამოქალაქო თვითმფრინავისა და რუსული საჰაერო დაზვერვის კონფრონტაცია, ასევე ესტონელი მზვერავი ოფიცრის მოტაცება.
როგორ მოვაშინაუროთ დათვი
ის ფაქტი, რომ რუსეთის პრეზიდენტი პოლიტიკურად უფრო გააქტიურდა, საიდუმლოს არ წარმოადგენს. მას სურს, რუსეთმა დიდი როლი ითამაშოს მსოფლიო არენაზე და ყველაფერს დაბრკოლებად განიხილავს, რაც რუსული გავლენის გავრცელებას უშლის ხელს. ყირიმის ანექსია და უკრაინელი სეპარატისტების მხარდაჭერა სწორედ ამის დემონსტრაციაა.
უკრაინაში წარმოიშვა დასავლეთთან ინტეგრაციის ტენდენცია, იყო საუბარი ნატოში შესვლაზეც. ნატოს ოფიციალურ ვებგვერდზე ნათქვამია:
„რუსეთის არალეგალური და არალეგიტიმური ანექსიის საპასუხოდ უკრაინაში, ნატო აგრძელებს უკრაინის მხარდაჭერას მისი ტერიტორიული სუვერენიტეტისა და ერთიანობისადმი, იმ საზღვრების ფარგლებში, რომელიც საერთაშორისო მასშტაბითაა აღიარებული.“, - აღნიშნულია სტატიაში.
"ფორბსი" ასევე წერს, რომ "მიუხედავად ამგვარი მხარდაჭერისა, აღსანიშნავია, რომ ნატოს ჯარები არ შეინიშნება კონფლიქტური ზონების სიახლოვეს. მისი მხარდაჭერა ჰუმანიტარულია, დიპლომატიური და არა სამხედრო":
"რაც შეეხება ევროკავშირსა და აშშ-ს, მათაც დაუწესეს რუსეთს სანქციები, რამაც ნეგატიური გავლენა იქონია მის ეკონომიკაზე. ზოგჯერ ამგვარი ზომები საკმარისია იმისთვის, რომ გაბრაზებულმა დათვმა უკან დაიხიოს, მაგრამ არა ყოველთვის.
პრობლემის მოგვარებას დრო დასჭირდება. დასავლეთმა უნდა შეინარჩუნოს მტკიცე პოზიცია რუსეთისადმი და შეზღუდოს მასთან კოლაბორაცია, რამდენადაც ეს შესაძლებელია (ისეთ სფეროებში, როგორიცაა მაგალითად სპორტი და კულტურული ივენთები). ხოლო როცა რუსეთი გადადგამს ნაბიჯს კონფლიქტის მოგვარებისკენ, ევროპა მასზე სანქციებს შეამსუბუქებს", - ნათქვამია სტატიაში.
"ფორბსის" მიხედვით მოამზადა ბექა ბერულავამ