2014-05-23 18:21

საქართველოს თავდაცვის მინისტრი სამხედრო ქვედანაყოფების მონახულებს განაგრძობს. დღეს, ირაკლი ალასანია მარნეულის საავიაციო ბრიგადაში იმყოფებოდა. 

თავდაცვის უწყების ხელმძღვანელი პირველად ქვედანაყოფის შტაბს ესტუმრა. ბრიგადის მეთაურმა, პოლკოვნიკმა დავით აბრამიშვილმა მინისტრს საავიაციო პარკის განვითარების გეგმის შესახებ პრეზენტაცია წარუდგინა. 

შტაბიდან ირაკლი ალასანიამ საავიაციო ტექნიკის დასათვალიერებლად გადაინაცვლა და პირად შემადგენლობას გაესაუბრა. თავდაცვის მინისტრმა ბაზაზე დასრულებული და მიმდინარე ინფრასტრუქტურული სამუშაოებიც მოინახულა. დასრულების ეტაპზეა ლაზარეთი, საქვაბე და ბატალიონის შტაბის შენობა; სარემონტო სამუშაოები უტარდება ყაზარმას. უახლოეს დღეებში დაიწყება ბაზის ტერიტორიის კეთილმოწყობა.

მარნეულის საავიაციო ბრიგადაში სტუმრობა თავდაცვის მინისტრმა სასწავლო ფრენებში მონაწილეობით დაასრულა.