გალის რაიონში მომხდარი შეტაკებისას აფხაზეთის ე.წ. ანტიტერორისტული ცენტრის თანამშრომელი ედუარდ ნერსესიანი და რუსი ოკუპანტი, ე.წ. მესაზღვრე ანდრეი უდალცევი დაიღუპნენ.
ისინი ადგილობრივი მცხოვრების გამტაცებლების წინააღმდეგ დაგეგმილ სპეცოპერაციაში მონაწილეობდნენ. ურთიერთსროლისას ორი გამტაცებელიც დაიღუპა.
ეს არაა პირველი შემთხვევა, როცა ადგილობრივ კრიმინალებთან შეტაკების დროს აფხაზური სტრუქტურების ან გალის რაიონში, საოკუპაციო ხაზთან განთავსებული რუსეთის სამხედრო ძალების წარმომადგენლები ზარალდებიან, თუმცა, მსგავსი შემთხვევები არ ხმაურდება.
აფხაზური სტრუქტურების წარმომადგენლები აცხადებენ, რომ ორი მოკლული გამტაცებლის ვინაობა დადგენილია და ისინი საქართველოს მოქალაქეები არიან, თუმცა, არ ასახელებენ მათ ვინაობას. მათივე ცნობით, გამტაცებლები სულ სამნი იყვნენ, გაქცეული კი ქართული სპეცსამსახურების ყოფილი წარმომადგენელია.
გალის აფხაზური ადმინისტრაციის მეთაური თემურ ნადარაია ამბობს, რომ ტერაქტებითა და გამოსასყიდის მიღების მიზნით მოქალაქეების გატაცებაში სწორედ საქართველოს მოქალაქეები არიან დაკავებული, თუმცა, ამის დამადასტურებელი არანაირი მტკიცებულება ინტერვიუს მსვლელობისას არ წარმოუდგენია.
ლაშა ბერულავა
