2015-09-19 13:46

რუსეთში აკრძალეს ფილმ "სიყვარულის" ჩვენება, რომელიც ფრანგმა და არგენტინელმა რეჟისორმა გასპარ ნოემ გადაიღო და პრემიერა კანის კინოფესტივალზე შედგა. ოფიციალური განმარტებით, აკრძალვის მიზეზი ფილმში პონოგრაფიის სცენების სიუხვეა.

რუსეთის ფართო ეკრანებზე ფილმი 3 სექტემბრიდან უნდა გასულიყო, თუმცა, სამინისტროს გადაწყვეტილების შემდეგ მას მხოლოდ კინოფესტივალებზე უჩვენებენ. უახლოესი ასეთი ფესტივალი 27 სექტემბერს, სანკტ-პეტერბურგშია დაგეგმილი. 

არადა, გაქირავების კომპანია აცხადებდა, რომ ფილმის Soft ვერსია გავიდოდა ეკრანზე, რაც ღია სცენების დროს ფილმიდან მათ ამოჭრას ან რეტუშირებას გულისხმობს. ამასთან, ფილმი +18 ნიშნით და ღამის კინოსეანსის დროს უნდა გასულიყო. თავად გასპარ ნოე მიიჩნევს, რომ მისი ფილმისთვის შეზღუდვა +12 უკვე საკმარისი იქნებოდა.

სანკტ-პეტერბურგის საკრებულოს დეპუტატმა ვიტალი მილონოვმა "სიყვარული" და ჰიტლერის "ჩემი ბრძოლა" შეადარა და განაცხადა, რომ "სიყვარული" შესაძლოა, კინემატოგრაფიის შესწავლის მიზნით ნახო, დახურულ წრეში, ისევე, როგორც "მაინ კამპფი", მაგრამ ღიად მისი ჩვენება დაუშვებელია. მე არ ვაპირებ ამ ფილმის ნახვას. ჩემთვის არაა საინტერესო ეროტიკული მელოდრამები. ეს ნორმალურ რუს მამაკაცს არ აინტერესებს, შესაძლოა, მოზარდები დააინტერესოს", - აღნიშნა მილონოვმა.

აღსანიშნავია, რომ მილონოვისა და სხვათა კრიტიკული დამოკიდებულების შემდეგ "სიყვარული" გაქრა სანკტ-პეტერბურგის ფესტივალის აფიშებიდანაც. 

შეგახსენებთ, გასპარ ნოეს ფილმი "სიყვარული" ბათუმის საავტორო კინოს მეათე საერთაშორისო ფესტივალზე უკვე უჩვენეს და კინოჩვენებას ექსცესები არ მოჰყოლია.