2015-06-13 10:06

ჯანდაცვის სამინისტროს საზოგადოებასთან ურთიერთობის სამსახურში აცხადებენ, რომ მომღერალ ეკა კვალიაშვილის პრეტენზიები იმასთან დაკავშირებით, თითქოს მისი მკურნალობა არ დაფინანსდა, უსაფუძვლო და გაუგებარია. 

შეგახსენებთ, "რეაქციაში" ეკა კვალიაშვილმა განაცხადა, რომ სახელმწიფოსგან არანაირი დაფინანსება არ მიუღია, ხოლო თავისა და ოჯახის რჩენა უჭირს:

"რომელ სოციალურ პაკეტებზე არის საუბარი არ ვიცი... აზრზე არ ვარ... რას ლაპარაკობთ… მე მართლა ვთვლი რომ ნამდვილად პროფესიონალი და მოქმედი მომღერალი ვარ. ვარ აბსოლუტურად უმოქმედოდ, იმიტომ რომ წელიწადში სამი კონცერტი ეს არ არის მოქმედება, თავს ვერ ირჩენ. ვერც თავს ირჩენ, ვერც ოჯახს. გადავკვალიფიცირდე, შახტიორი უნდა გამოვიდე თუ რა უნდა გავაკეთო?", -  განაცხადა ეკა კვალიაშვილმა. 

წამყვანის კითხვაზე - სახელმწიფო დაზღვევას არ იყენებთ?- ეკა კვალიაშვილმა განაცხადა. "რომელი სახელმწიფო დაზღვევა? აი საყოველთაო რომ არის? აი საყოველთაოა რა, გასაგებია. ის საყოველთაოა..."

ჯანდაცვის სამინისტროში აცხადებენ, რომ ეკა კვალიაშვილი იმდენჯერ დაფინანსდა, რამდენჯერაც ჯანდაცვის სამინისტროს მიმართა და კალკულაცია წარმოადგინა და ისარგებლა როგორც საყოველთაო ჯანდაცვის პროგრამით, ასევე რეფერალითაც

"რაც  მოითხოვა, რისი ფორმა 100 და კალკულაცია წარმოადგინა, ყოველთვის დაფინანსდა. რაც შეეხება უცხოეთში მკურნალობის ეკა კვალიაშვილმა უცხოეთიდან ვერც ფორმა 100 წარმოადგინა და ვერც და კალკულაცია.შესაბამისად, ვერ მოხდებოდა მისი დაფინანსება.

რაც შეეხება იმ ათი ათას დოლარს თუ ევროს, რითაც ეკა კვალიაშვილის საზღვარგარეთ დაფინანსება უნდა მომხდარიყო, ეკამ ვერ წარმოადგინა საზღვარგარეთ მკურნალობის კალკულაცია, შესაბამისად, სამინისტრო თანხას ეკას პირად ანგარიშზე ვერ დარიცხავდა“- აღნიშნავენ ჯანდაცვის სამინისტროს საზოგადოებასთან ურთიერთობის სამსახურში.