2015-07-26 17:31

თავდაცვის მინისტრი თინა ხიდაშელი აცხადებს, რომ თუ საქართველოს შეიარაღებული ძალების ყოფილი სამხედრო მოსამსახურე უკრაინაში დაიღუპა, ის თავისუფლებისთვის მებრძოლია და აუცილებლად სამხედრო პატივით უნდა დაიკრძალოს. ამასთან, ხიდაშელი ხაზს უსვამს, რომ ეს ეხება ყოფილ მეომრებს და არა მოქალაქეებს, რომლებიც უკრაინაში იბრძვიან.

რადიო "თავისუფლებისთვის" მიცემულ ინტერვიუში თავდაცვის მინისტრი ამბობს, რომ თავისუფლებისთვის დაღუპული ყოფილი მეომრების დაკრძალვა სამხედრო პატივით ქვეყნის პრესტიჟის საკითხია:

"თუ ისინი არიან საქართველოს შეიარაღებული ძალების ყოფილი მეომრები, მაშინ ისინი სამხედრო პატივით უნდა დაიკრძალონ. თუ ჩვენ ვლაპარაკობთ რიგით მოქალაქეებზე, რომლებიც იბრძვიან, ეს იქნება, ალბათ, სხვა ტიპის ღონისძიება. ჩემი, როგორც პოლიტიკოსის, აზრი თუ გაინტერესებთ, ისინი ყველანი არიან თავისუფლებისთვის მებრძოლები. როგორც თავდაცვის მინისტრის პოზიციაა, რომ ყველა ჯარისკაცი, რომელიც მანამდე მსახურობდა ქართულ ჯარში, ღმერთმა დაიფაროს, რომ ასეთი მსხვერპლი იყოს, მაგრამ თუ იყო, დაიკრძალება სამხედრო პატივით", - განაცხადა ხიდაშელმა.