ხელვაჩაურის რაიონის სოფელ ახალსოფელში მომხდარი ტრაგიკული შემთხვევის შედეგად დაღუპული ორი მამაკაციდან ერთ-ერთი ბათუმის საკათედრო ტაძრის სტიქაროსანი, 22 წლის თორნიკე მახარაძეა.
წმინდა გიორგის სახელობის ტაძრის მშენებლობას ახალსოფელში ხელმძღვანელობდა ბათუმის საკათედრო ტაძრის მღვდელმსახური, დეკანოზი მარკოზ ბექაია. თორნიკე სწორედ მისი სტიქაროსანი იყო და ის საკუთარ მოძღვარს ტაძრის მშენებლობაზე ეხმარებოდა. თორნიკე მახარაძე 16 ივლისს 23 წლის გახდებოდა.
შეგახსენებთ, რომ ეკლესიის 50 ტონამდე მასის გუმბათის ჩამონგრევის დროს მშენებლობაზე სულ ხუთი ადამიანი მუშაობდა, მათგან ერთმა ხარაჩოდან გადმოხტომა მოასწრო, ოთხი კი ნანგრევებში მოყვა.
სამაშველო სამსახურმა ორი ადამიანი, რომელთაც მძიმე დაზიანება მიიღეს, ნანგრევებიდან ცოცხლად ამოიყვანა, ორი გარდაცვლილის ცხედართა პოვნას და ნანგრევებიდან ამოყვანას ორი საათი დასჭირდა.
წინასწარი ინფორმაციით, გუმბათის ჩამონგრევა საყრდენი ბოძების ნაადრევად გამოცლამ ან უხარისხო სამშენებლო მასალამ გამოიწვია. მშენებლები ადგილობრივები არ იყვნენ, თუმცა დღეს, გუმბათის ჩამონგრევამდე მათ საქმეში ადგილობრივი მცხოვრებლებიც ეხმარებოდნენ.
წმინდა გიორგის სახელობის ეკლესია მეოთხე წელია, შენდება.