ხელვაჩაურის რაიონის სოფელ ახალსოფელში ეკლესია ჩამოინგრა. ნანგრევებქვეშ ოთხი ადამიანი მოყვა. აქედან ორი მაშველებმა უკვე ამოიყვანეს. სავარაუდოდ, ნანგრევებსი დარჩენილი ორი ადამიანიც ცოცხალია. მომხდარის შესახებ ინფორმაციას „ინტერპრესნიუსი“ საკუთარ კორესპონდენტზე დაყრდნობით ავრცელებს.
როგორც შემთხვევის ადგილზე მყოფ "ინტერპრესნიუსის" კორესპონდენტს სასწრაფო სამედიცინო დახმარების ბრიგადის ექიმმა, იამზე ივანიაძემ განუცხადა, ორივე დაშავებულის სიცოცხლეს საფრთხე არ ექმუქრება. მისივე განმარტებით, ერთ-ერთ დაშავებულს აქვს კიდურების ტრავმა, მეორეს კი - ბარძაყის ძვლის მოტეხილობა.
ვარაუდობენ, რომ ნანგრევებში მოყოლილი კიდევ ორი ადამიანი ცოცხალია.
სოფელ ახალსოფელში იმყოფებიან სასულიერო პირები და ბათუმის თვითმმართველობის წარმომადგენლები. ადგილზე მობილიზებულია სამაშველო სამსახურის რამდენიმე ბრიგადა და სასწრაფო სამედიცინო დახმარების სამსახური. ეკლესიასთან შეკრებილია ახალსოფლის მოსახლეობა.
წმინდა გიორგის სახელობის ეკლესია უკვე მეოთხე წელია შენდება. ეკლესიის გუმბათი მას შემდეგ ჩამოინგრა, რაც მშენებლობაზე დასაქმებულმა პირებმა ნაგებობას საყრდენი ბოძები გამოაცალეს.
"ინტერპრესნიუსის" ფოტოები
