2014-05-04 02:44

ამ წუთებში უკრაინის შეიარაღებული ძალები და შსს აგრძელებენ სპეციალურ ანტიტერორისტულ ოპერაციას უკრაინის სხვადასხვა ქალაქებში. დაძაბული მდგომარეობაა მარიუპოლში და ლუგანსკში, ასევე კონსტანტინოვკაში.

მარიუპოლის ცენტრში გამაგრებულმა სეპარატისტებმა საბურავები დაწვეს და ბარიკადები აღმართეს, ქალაქში სროლისა და სასწარფო დახმარების სირენების ხმა ისმის. უკრაინელი ძალოვნები უკვე შევიდნენ ქალაქში და ცენტრისკენ მიიწევენ, სადაც სეპარატისტები არიან გამაგრებული.

ეროვნულმა გვარდიამ მოიგერია შტურმი, რომელიც სეპარატისტებმა ლუგანსკში მდებარე ერთერთ სამხედრო ნაწილზე მიიტანეს. სამხედრო კომუფლჟებში ჩაცმულმა, კალაშნიკოვის ავტომატებით შეიარაღებულმა პირებმა ჯარისკაცებს იარაღის დაყრა და შენობების დატოვება მოსთხოვეს, მაგრამ უარი მიიღეს. სამხედრო ნაწილის შტურმით აღების მცდელობა უშედეგოდ დასრულდა.

ამ წუთებში ორმხრივი სროლაა ასევე დონეცკის ოლქის ქალაქ კონსტანტინოვკაში. იქ ბრძოლები, ძირითადად, ტელეანძის დასაკავებლად მიმდინარეობს. ოპერაციაში ჩართულია უკრაინის შსს-ს კუთვნილი ვერტმფრენიც.

სეპარატისტებმა წარმატებას მხოლოდ დონეცკის ოლქში მიაღწიეს: არმატურის ნაჭრებით, ბეისბოლის ბითებითა და ხელჯოხებით შეიარაღებულმა პირებმა შეძახილით „როსია!“ დაახლოებით ორ წუთში აიღეს დონეცკის უშიშროების სამსახურის დონეცკის ოლქის შენობა (იხილეთ ვიდეო).

ანტიტერორისტული ოპერაცია გრძელდება. ჯერ არ არის გარკვეული, როდის დასრულდება ის. უკრაინის შსს-მ სეპარატისტებისგან გათავისუფლებულ ოდესაში დამატებითი სამხედრო-საპატრულო ჯგუფები გაგზავნა.