2014-05-03 21:32

ჟურნალისტი და ტელეწამყვანი ნანუკა ჟორჟოლიანი ამბობს, რომ საეჭვოა, პოლიციას აღიარებით ჩაბარებული ნოშრევან ნამორაძე დავით კოდუაზე თავდამსხმელი ყოფილიყო. განცხადება მან "კურიერში" ჩართვის დროს გააკეთა,

„დავით კოდუასთან სახლში ნოშიკო ნამორაძე არაერთხელ არის ნამყოფი, ამიტომ ძიძა მას აუცილებლად იცნობდა“, - განაცხადა ნანუკა ჟორჟოლიანმა და დაამატა, რომ უამრავი თვითმხილველი არსებობს იმისა, რომ ეს იყო ჯგუფური თავდასხმა.

ნანუკა ჟორჟოლიანმა ასევე განაცხადა, რომ როგორც შსს-ს ყოფილმა ოპერატიულმა მუშაკმა, ერეკლე კოდუამ სთხოვა, მისი მეშვეობით მიაწოდოს შსს-ს აბაშიძის ქუჩაზე მდებარე იმ რვა სათვალთვალო კამერის სქემა, რომლებსაც შეეძლო მომხდარი თავდასხმა გადაეღო.

„თავდასხმა მოხდა შუა ბაშიძეზე, დღისით-მზისით, სადაც ადამიანები თავისუფლად გადაადგილდებიან და გამოდის, რომ ნოშიკო ნამორაძე რომ არ ჩაბარებულიყო, შსს-მ ეს რვა კამერაც ვერ იპოვა. ასეთ შემთხვევაში ჩვენ უნდა ვაღიაროთ, რომ ამ ქალაქში დაიწყება ორმხრივი სროლები, რადგან ქუჩაში დადიან შავებში, ერთნაირ ტანსაცმელში ჩაცმული, ელექტროშოკით შეიარაღებული ადამიანები.

დავით კოდუას დღეს თავს დაესხნენ მცირეწლოვან ბავშვთან ერთად. არავის ეგონოს, რომ მე ამ თემით დღეს ვსპეკულირებ ან ვინმესთვის გულის აჩუყებას ვცდილობ, მაგრამ თუ ეს ასე გაგრძელდება, ეს არის ეშმაკის ბორბალი და მასზე ჩვენ ვიტრიალებთ დაუსრულებლად, რაც ძალიან ცუდი იქნება ჩვენი შვილების მომავლისთვის“, - განაცხადა ნანუკა ჟორჟოლიანმა.