2014-05-03 19:03

რამდენიმე დღის წინ „აფხაზეთის ხმას“ მიაწოდეს ვიდეო, სადაც ასახული იყო, თუ როგორ ახდენს ზეწოლას  მარტვილის #65-ე საუბნო-საარჩევნო ოლქის კომისიის წევრ ნინო დანელიაზე  კოალიცია „ქართული ოცნების“ მარტვილის რაიონული ორგანიზაციის წარმომადგენელი ლევან სურმავა.

„აფხაზეთის ხმა“ ადგილზე გაეცნო ვითარებას. ჩვენთან საუბარში #65-ე საუბნო საარჩევნო ოლქის კომისიის წევრმა ნინო დანელიამ უარყო მასზე რაიმე ზეწოლის ფაქტი. მისი თქმით, ის რაც ვიდეოში ჩანს, მხოლოდ საუბარი იყო, პარტიის წარმომადგენლის მხრიდან დასმულ შეკითხვებზე პასუხის გაცემა. ასევე, მისი (ლევან სურმავას) აზრის მოსმენა თუ რომელ პირს (საუბნო საარჩევნო კომისიის წევრი) უფრო კომპეტენტურად მიიჩნევს იგი.

ზეწოლის ფაქტს უარყობს კოალიცია „ქართული ოცნების“ მარტვილის რაიონული ორგანიზაციის წარმომადგენელი ლევან სურმავაც.

„არანაირი ზეწოლა ოლქის წარმომადგენელ ნინო დანელიასთან არ ყოფილა.  ეს იყო საუბარი. ფურცელზე, რომელიც ვიდეოზე ჩანს, ჩამოწერილია საუბნო საარჩევნო კომისიის სავარაუდო წევრები, რომელზეც ნინოს ვეკითხები, თუ რა ნიშნით შეარჩიეს კანდიდატები და რითი სჯობია ერთი მეორეს, ვუფიქსირებ ჩემს აზრს, რომელი უფრო კომპეტენტურია საარჩევნო საკითხებში და ა.შ.“, - ამბობს სურმავა. 

თუმცა, ზეწოლის ფაქტებს არ უარყობს მარტვილის #65-ე ოლქის კომისიის თავმჯდომარე გია ბართაია, რომელიც „აფხაზეთის ხმასთან“  ამბობს, რომ პირადად მასზე ზეწოლა არ ყოფილა, თუმცა საოლქო კომისიის წევრების მიმართ მსგავსი ფაქტები მოხდა.