2014-05-03 11:24

„პროკურატურაში ბევრჯერ ვიყავი, ძალიან ბევრჯერ ისეც ვიყავი მისული, რომ ჟურნალისტებმა ვერ შემამჩნიეს. ჩემი ახლობლები რომ მეკითხებოდნენ, რაზე დადიხარო, ვეუბნებოდი, სტაჟირებაზე დავდივარ-მეთქი“, -

განაცხადა საქართველოს ყოფილმა თავდაცვის მინისტრმა ირაკლი ოქრუაშვილმა გადაცემა „პოზიციაში“, როცა წამყვანი პროკურატურაში მისი ხშირი ვიზიტებით დაინტერესდა.

ირაკლი ოქრუაშვილმა წინასწარ დაანონსებული „გეგმა ბ“-ც გაახმიანა და განაცხადა, რომ მას შემდეგ, რაც გორის მერობის კანდიდატად დარეგისტრირებაზე საბოლოო უარი მიიღო, გადაწყვიტა, რომ მისი გუნდი მერობის კანდიდატად გორში კახა ერგემლიძეს წარადგენს, რომელიც, გამარჯვების შემთხვევაში, ვიცე-მერად ირაკლი ოქრუაშვილს დანიშნავს.

ოქრუაშვილის თქმით, პროკურატურაში ჩვენება რამდენიმე საკითხზე, მოწმის სტატუსით მისცა. საქმეების ჩამონათვალში ირაკლი ოქრუაშვილმა მიხეილ სააკაშვილის წინააღმდეგ მიცემული რამდენიმე ჩვენებაც ახსენა და წამყვანის შეკითხვაზე, მისცა თუ არა ხმა სააკაშვილის წინააღმდეგ, უპასუხა: „ამ შანსს ხელიდან როგორ გავუშვებდი?“, ხოლო შემდეგ სააკაშვილთან მისი დაპირისპირების დეტალებზე ისაუბრა:

„არავის გაუკვირდეს, რომ მე მასთან ჩემი ანგარიშები მაქვს. ჩვენ არა ვართ „კაი ბიჭები“, ვართ სხვადასხვა გზით მიმავალი ადამიანები და ის მეტია ჩემთვის, ვიდრე მოწინააღმდეგე.

ყველას მოსდის ერთი და იგივე შეცდომა: გამოდიან და იწყებენ იმაზე საუბარს, რა ხდებოდა შიგნით, ვის დაიჭერენ, ვის დაკითხავენ და ასე შემდეგ. მე არ ვარ ის პირი, რომ თუნდაც სააკაშვილის გასაგონად ვისაუბრო, რაზე ვისაუბრე მე მოწმის სტატუსით დაკითხვის დროს“, - თქვა თავდაცვის ექსმინისტრმა, ხოლო „რუსთავი-2“-ის საქმესთან დაკავშირებით განაცხადა:

„ამ თემაზე, ასე ვთქვათ, სუბიექტური დაინტერესება არსებობს, რადგან მე ამ ტელევიზიის „სათავესთან“ თავის დროზე ვიყავი და შეიძლება დელიკატური თემა იყოს ჩემთვის“.