„რუსთავი-2“-ის გადაცემაში საქართველოს პრეზიდენტის ყოფილმა მრჩეველმა ვანო მაჭავარიანმა დაადასტურა, რომ გადადგომის შესახებ გადაწყვეტილება პირადად გიორგი მარგველაშვილის თხოვნით მიიღო.
მაჭავარიანმა განაცხადა, რომ იყვნენ ადამიანები, რომლებსაც მარგველაშვილის მიერ დაკომპლექტებული გუნდი არ მოსწონდა, იმის მიუხედავად, რომ ამ გუნდმა პრეზიდენტის ადმინისტრაცია მნიშვნელოვან აქტორად აქცია საერთაშორისო არენაზე, ამის ბოლო დადასტურება კი კიევში ჯო ბაიდენთან შეხვედრა იყო.
„იყო რამდენიმე ადამიანი,რომელსაც ეს არ მოსწონდა, ეს იყო უბრალოდ არასწორი მიდგომა საქმისადმი, მე არასდროს არ ვერეოდი შიდა თემებში, ვიყავი დაკავებული საგარეო მიმართულებით. მე მივედი ადმინისტრაციაში გიორგი მარგველაშვილის თხოვნით. ძალიან მნიშვნელოვანია პრეზიდენტის ინსტიტუტი და გიორგი მარგველაშვილს, როგორც სახელმწიფოს მეთაურს აქვს უზარმაზარი რესურსი“, - აცხადებს ვანო მაჭავარიანი.