საქართველოს პრეზიდენტი (2004-2013 წ.წ. ) მიხეილ სააკაშვილი მიიჩნევს, რომ უკრაინაში შექმნილი სიტუაციის შემდეგ მთელმა მსოფლიომ გაიღვიძა და „ყველას უნდა რაღაც გააკეთოს საქართველოსთვის“, რის გამოც ისეთი შანსი, როგორიც ახლა გვაქვს, არასდროს გვქონია.
მიხეილ სააკაშვილმა ბარაკ ობამასთან შეხვედრის დეტალებზეც ისაუბრა და აშშ-სთან მიღწეული სხვა შეთანხმებებიც გაიხსენა:
„მე გუშინაც ვესაუბრე პრეზიდენტ ობამას იმაზე, რომ ჩვენს ქვეყნას ახლა ისე, როგორც არასდროს სჭირდება გვერდზე დგომა, თან არსებობს სტარტეგიული ურთიერთობის შესახებ შეთანხმება, რომელსაც თავის დროზე ხელი მოაწერეს აშშ-სთან კონდოლიზა რაისმა და გია ვაშაძემ, ასევე ის შეთანხმება, რომელსაც მივაღწიეთ 2012 წელს იანვარში, თეთრ სახლში, ჩემი ვიზიტის დროს, რომ ამერიკა მისცემს საქართველოს შეიარაღებას.
მაგრამ ისეთი უნიკალური გეოპოლიტიკური სიტუაცია, როგორიც ახლაა უკრაინის გამო, როცა ყველამ გამოიღვიძა და ყველას უნდა რაღაცის გაკეთება, არასდროს არ ჰქონია საქართველოს, ახლა როგორც არასდროს ისე უნდა გავანძრიოთ ხელი, რომ არ გაგვქცეს ხელიდან ეს შანსი და ამისთვის მე ყველაფერს გავაკეთებ და მოვივლი მსოფლიოს“, - განაცხადა მიხეილ სააკაშვილმა.
