ნიკა გვარამიას, კახა დამენიასა და ზურაბ იაშვილის საქმეზე წინასასამართლო სხდომა ხვალ, თბილისის საქალაქო სასამართლოში 14:00 საათზე გაიმართება.
„რუსთავი 2“ - ის ყოფილ გენერალურ დირექტორს ნიკა გვარამიას ბრალად ედება ჯგუფის მიერ წინასწარი შეთანხმებით დიდი ოდენობით „რუსთავი 2“-ის კუთვნილი ქონებრივი უფლების გაფლანგვა, კომერციული მოსყიდვა, უკანონო შემოსავლის ლეგალიზაცია და ყალბი ოფიციალური დოკუმენტის დამზადება. იგი ასევე ბრალდებულია სამსახურეობრივი უფლებამოსილების ბოროტად გამოყენებაში.
გვარამიას აღკვეთის ღონისძიების სახით 40 000-ლარიანი გირაო შეეფარდა, ამასთან, მას ქვეყნიდან გასვლის უფლება შეეზღუდა.
რაც შეეხება „რუსთავი 2“-ის ყოფილ ფინანსურ დირექტორს კახა დამენიას, მას პროკურატურა კომპანიის კუთვნილი ქონებრივი უფლების დიდი ოდენობით მართლსაწინააღმდეგო გაფლანგვას ედავება, რაც ასევე წინასწარი შეთანხმებით, ჯგუფის მიერ იქნა ჩადენილი.
დამენიას აღკვეთის ღონისძიების სახით 50 000-ლარიანი გირაო შეეფარდა. მას ასევე, აეკრძალა სახელმწიფო საზღვრის დატოვება საგამოძიებო ორგანოს ინფორმირებისა და თანხმობის გარეშე.
„ინტერ მედია პლიუსის“ დირექტორს ზურაბ იაშვილს კი კომერციულ მოსყიდვასა და ყალბი ოფიციალური დოკუმენტის დამზადებაში ედება ბრალი.
იაშვილს აღკვეთის ღონისძიების სახით 50 000-ლარიანი გირაო შეეფარდა.