2016-02-19 19:22

გამოცემა The Wall Street Journal წერს, რომ პრივატ-ბანკინგის სფეროში მიღწეული წარმატებების რეკლამირების კვალდაკვალ , Credit Suisse-ს მოუწევს, აღშფოთებული ქართველი მილიარდერის პრეტენზიებს უპასუხოს. 

გამოცემის თანახმად, ბიძინა ივანიშვილმა ჟენევაში სარჩელი აღძრა და ამტკიცებს, რომ ამ კომპანიის წარმომადგენელი, ვინც მას დაქირავებული ჰყავდა,  არასწორად მართავდა მის ფინანსებს, რამაც მსხვილი დანაკარგი გამოიწვია.

ივანიშვილის რწმუნებულის მარკ ენზელინის თქმით, შარშან, იმ დროს, როცა დანაკარგებისა და გაცემის დასაფარად ანგარიშებზე მილიარდერი ფულის შეტანას აპირებდა, მან შეამჩნია, რომ რაღაც რიგზე ვერ იყო.

„დეკემბერსა და იანვარში ივანიშვილმა ჟენევის პროკურატურაში ორი სისხლის სამართლის სარჩელი აღძრა თაღლითობისა და ფინანსების არასწორად განკარგვის ბრალდებით“, - აღნიშნულია სტატიაში.

Credit Suisse-ს ყოფილი მენეჯერი პატრის ლესკორდინი ახლა ჟენევაში, სამართლებრივი ზედამხედველობის ქვეშ იმყოფება - ამის შესახებ გამოცემას მისმა ადვოკატმა ინფორმაცია დაუდასტურა. ბანკმა მას დეკემბერში უჩივლა, სამსახურებრივი მოვალეობის არაჯეროვანი შესრულების გამო.

„ლესკადრონმა თავისი სხვა კლინეტების დანაკარგების გადაფარვა ივანიშვილის ფულის გამოყენებით სცადა“, - ამბობს გამოცემის წყარო. – „მაგრამ ის, რა მეთოდითაც სარგებლობდა ლესკადრონი ივანიშვილის თანხის განკარგვისას, ბევრ კითხვას აჩენს და არცთუ გამჭვირვალეა“.  წყარომ დაამატა, რომ ამის გარკვევას წლები დასჭირდება.

გამოცემას მოჰყავს „ფორბსის“ ბოლო მონაცემები, რომლის თანახმადაც ივანიშვილის ქონება 4,8 მილიარდ აშშ დოლარადაა შეფასებული. 

წყარო